Përplasja e trenave, pamje të reja që tregojnë dëmet e shkaktuara nga aksidenti që ua mori jetën 32 njerëzve në Egjipt

Një përplasje e trenave në Egjipt ka vrarë të paktën 32 njerëz dhe ka lënduar të paktën 66 të tjerë, tha ministria e shëndetësisë e vendit.

Sipas mediave të huaja, përcjell Telegrafi, trenat po lëviznin nëpër provincën Solag, rreth 286 milje në jug të Kajros.

Autoriteti hekurudhor i vendit tha se frenat e emergjencës në trenin e parë u ndikuan nga “individë të panjohur”, duke bërë që treni të ndalet menjëherë.

Një tren i dytë më pas u përplas me të parin nga prapa, duke bërë që dy vagonë të dilnin nga binarët.

Autoritetet shëndetësore dërguan 36 ambulanca në vendngjarje dhe viktimat po merreshin në spitalet lokale, tha ministria në një deklaratë.

Të paktën 66 persona u plagosën në përplasje dhe zyra e prokurorit publik tha se kishte urdhëruar një hetim.

Ndërkohë pamjet në mediat sociale tregojnë rrënojat e trenit dhe njerëzit e grumbulluar rreth tij, me pjesë të trenit të varura plotësisht dhe njerëzit që ngjiten në çatinë e hekurudhave.

“Trenat u përplasën ndërsa shkonin me shpejtësi jo shumë të larta, gjë që çoi në shkatërrimin e dy vagonëve dhe një të tretin që është përmbysur”, i ka thënë një burim sigurie, agjencisë së lajmeve Reuters.

Aksidentet hekurudhore janë të zakonshme në kombin afrikan verior, i cili ka një nga rrjetet hekurudhore më të mëdha dhe më të vjetra.

Sipas të dhënave më të fundit zyrtare, 1,793 aksidente trenash ndodhën në të gjithë Egjiptin në vitin 2017. /Telegrafi/