Vazhdojnë bisedimet, Kurti dhe Vuçiq i rikthehen takimit në Ohër

(E plotësuar 18:30) Pas një pauze mbi një orëshe, kryeministri i Kosovës, Albin Kurti, dhe presidenti i Serbisë, Aleksandar Vuçiq, kanë rinisur bisedimet, nën ndërmjetësimin e zyrtarëve evropianë.

Bartësit e dialogut po diskutojnë në Ohër të Maqedonisë së Veriut për planin e zbatimit të propozimit evropian për normalizimin e raporteve.

BE-ja më herët tha se Kurtit dhe Vuçiqit do t’iu prezantojnë një “plan të konsoliduar” të zbatimit të këtij propozimi, që synon t’i çojë palët drejt një marrëveshjeje përfundimtare.

Më herët kishte informacione për përfundimin e takimit – pak minuta para orës 17:00 – por, bëhej fjalë vetëm për një pauzë.

Dy udhëheqësit po takohen me ndërmjetësimin e zyrtarëve të BE-së për të diskutuar zbatimin e një plani evropian për normalizimin e marrëdhënieve.

_________________________________________

Ka përfunduar takimi i përbashkët midis kryeministrit të Kosovës, Albin Kurti, presidentit të Serbisë, Aleksandar Vuçiq, dhe ndërmjetësuesve të Bashkimit Evropian, Josep Borrell dhe Miroslav Lajçak në Ohër të Maqedonisë së Veriut.

Takimi ka zgjatur më shumë se një orë, ndërsa pritet që Borrell të dalë me një deklaratë.

Temë diskutimi ishte zbatimi i marrëveshjes së propozuar nga Bashkimi Evropian për normalizimin e marrëdhënieve mes Kosovës dhe Serbisë.

Lexo po ashtu Propozimi evropian dhe plani i zbatimit, gjithçka nga takimet në Ohër

Ndryshe, fillimisht përfaqësuesi i Lartë i Bashkimit Evropian, Josep Borrell ka mbajtur takimin me presidentin e Serbisë, Aleksandar Vuçiq, ndërkaq me pas edhe me kryeministrin e Kosovës, Albin Kurti.

Pas takimit bilateral, diku rreth orës 15:30 ka filluar takimi trepalësh ndërmjet Borrelit, Kurtit dhe Vuçiq.

E zëdhënësi i BE-së, Peter Stano në një deklaratë për media theksoi se në fund të takimit, përfaqësuesi i Lartë, Borrell do të dalë me një deklaratë për media.

Ai tha se kjo deklaratë pritet të bëhet në orët e mbrëmjes. /Telegrafi/