Pendarovski në takim me Alar Karis: Maqedonia e Veriut lartë vlerëson mbështetjen e fuqishme dhe të zëshme të Estonisë

Presidenti i RMV-së Stevo Pendarovski, sot në korniza të pjesëmarrjes në forumin e paqes të Parisit, ka realizuar takim me presidentin e Republikës së Estonisë, Alar Karis.

Siç njoftojnë nga kabineti i presidentit, në takim është konfirmuar miqësia dhe bashkëpunimi mes Republikës së Maqedonisë së Veriut dhe Estonisë dhe është thënë se ekziston nivel i mirë i dialogut politik mes dy vendeve. Presidenti Pendarovski, duke potencuar se Estonia është partner i RMV-së në KB, BE, NATO dhe OSBE, theksoi se Maqedonia e Veriut lartë vlerëson mbështetjen e fuqishme dhe të zëshme të Estonisë për integrimin e Maqedonisë në BE, si dhe bashkëpunimin në forumet ndërkombëtare.

Presidenti Pendarovski ka shprehur kënaqësi nga bashkëpunimi i deritanishëm në fushën e digjitalizimit dhe ka shprehur interesin tonë të implementojmë përvojën e Estonisë në këtë fushë.

Në takim është biseduar për situatën gjeopolitike në kontekst të luftës në Ukrainë, me fokus të gjendjes dhe implikimeve të sigurisë mbi shtetet baltike dhe ballkanike, me çka dy presidentët e përshëndetën bashkëpunimin e shkëlqyeshëm në korniza të NATOs.

Presidenti Pendarovski qëndron në vizitë pune në Republikën e Francës, në pjesëmarrje të Forumit të paqes.