Penalizimi i gjuhës shqipe, Lluka: Për mediat është jetike të zgjidhet problemi me Google

Dëmi që u është bërë mediave në gjuhën shqipe, duke mos u mbështetur nga Google, është shumë i madh. Kështu tha drejtori gjeneral i Telegrafit, Gentian Lluka, që ishte i ftuar në emisionin “Reload” në RTV Dukagjini, e ku foli për problematikën që po penalizon edhe mediat e Kosovës.

Lluka tha se mediat shqiptare nuk qëndrojnë mirë në konkurrencë me mediat botërore, për shkak të penalizimit nga platforma Google.

“Na është bërë një dëm i pariparueshëm nga Google. E vetmja gjuha shqipe bashkë me maqedonishten nuk suportohet në rajon. Paramendoje, estonishtja me 1 milionë banorë është e pranuar nga Google, derisa shqipja me 7 milionë apo më shumë banorë nuk pranohet”.

Ai thotë se Google nuk ka alternativë për mediat shqipe.

Lexo po ashtu Rasti Google dhe gjuha shqipe, Asllani kërkon ndihmën e institucioneve e ekspertëve nga Kosova, Shqipëria e diaspora

“Google thotë se njëra ndër arsyet pse nuk është pranuar gjuha shqipe është se tregu nuk është i zhvilluar. Por nuk mund të ketë zhvillim pa pranim në platformën e Google. Një analogji do të ishte sikurse të na kërkojnë zhvillimin e  bujqësisë në nivelin evropian pa traktorë. Po nuk mundet të zhvillohet bujqësia pa traktorë. Njëjtë edhe pa Google, mediat e gjuhës shqipe nuk mund të zhvillohen”, ka deklaruar ai.

Sipas tij, me këtë mospranim të shqipes nga Google, është dëmtuar edhe shoqëria në përgjithësi.

Ai madje propozon që çështja e Google të jetë më prioritare se dialogu me Serbinë.

“Nëse dëshiron një shoqëri të lësh mbrapa, kjo është forma më e mirë. Krijoje një ambient të dobët medial. Krijo media me pamundësi zhvillimi. Kur mediat nuk mund të zhvillohen, ato nuk mund të kenë kontent të mirë. Pra publikut i mbetet të konsumojë atë që u servohet. Unë bëj shaka, them më mirë është të ndalen negociatat me Serbinë e të zgjidhet problemi me Google”.

Lexo po ashtu Beteja ligjore kundër “Google” për diskriminimin e gjuhës shqipe, Asllani jep detajet e padisë

Si profesionistë i fushës prej viteve, Lluka ka dhënë këshilla edhe për lexuesit.

“Duhet të zgjidhini domenin nga informoheni. Lexojeni impresiumin se kush është brenda. E dyta të shikojnë referencën e burimit të lajmit e pastaj kush është gazetari”, shtoi ai.

Për të ardhmen e portaleve, i pari i Telegrafit thotë se edhe një kohë ato do të mbijetojnë, por me nevojën që të përshtaten me trendet e reja./Telegrafi/