Osmani në Klinë: Mërgata jonë do ta ketë respektin që e meriton

Kandidatja e Lidhjes Demokratike të Kosovës (LDK) për kryeministre, Vjosa Osmani, gjatë një tubimi në Klinë, ka thënë të enjten se me fitoren e  LDK-së në zgjedhje, mërgata do ta ketë respektin dhe kujdesin e shtetit.

“Për 20 vite nuk ia kemi dhënë mërgatës tonë vlerësimin që e kanë merituar. Një prej pjesës më të lavdishme të punës sonë, është diaspora e LDK-së, janë mërgata jonë. Ata jo vetëm që do ta kenë respektin që meritojnë, por do të kenë mundësi të reja për të investuar në shtetin e tyre, për të cilin derdhën aq shumë mund dekada me radhë”, ka thënë Osmani.

Ajo ka falënderuar mërgatën për kontributin që kanë dhënë për sensibilizimin, financimin dhe çlirimin e Kosovës, nga të katër anët e globit, Gjermania, Zvicra, Shtetet e Bashkuara dhe vendet tjera.

Duke komentuar tubimin e mbrëmshëm të LDK-së, Osmani tha se një tubim kaq të madh, nuk e kemi parë që nga koha e Presidentit Rugova.

“Ky tubim mi kujtoi takimet mobilizuese që i organizonte diaspora jonë në Evropë dhe Amerikë për të përkrahur Kosovën”, pohoi Osmani.