“Nuk është si unë”, Hazard e pranon dallimin e madh mes tij dhe Real Madridit

Pritej shumë nga Eder Hazard kur bëri lëvizjen nga Chelsea për t’iu bashkuar Real Madridit në verën e vitit 2019. Ylli belg mbërriti si një nga lojtarët më të mirë në botë, por karriera e tij katërvjeçare në kryeqytetin spanjoll rezultoi të jetë diçka si një fatkeqësi.

Një kombinim i lëndimeve dhe formës së dobët nënkuptonte që Hazard mezi mund të konsiderohej si lojtar i skuadrës deri në kohën kur karriera e tij në Real Madrid përfundoi verën e kaluar.

Carlo Ancelotti në thelb e kishte përjashtuar atë në atë fazë, gjë që çoi në një ndërprerje të kontratës reciproke. Disa javë më vonë, Hazard do të njoftonte pensionimin.

Lexo po ashtu Nga Buffon te Ozil, Bale, Hazard dhe Ibrahimovic – formacioni me legjendat që u pensionuan më 2023

Duke folur për gazetën L’Equipe, Hazard çuditërisht pranoi se nuk ndihej sikur i përshtatej gjatë kohës së tij në Real Madrid.

“Unë kam qenë një tifoz i Zinedine Zidane që kur isha fëmijë. Bernabeu, fanella e bardhë… ka një bukuri që të tjerët nuk e kanë. Real Madridi është i veçantë”, ka thënë fillimisht Hazard.

“Përtej kësaj, nuk mendoj se i përshtatem. Nuk është si unë. Është paksa një klub ‘mburravec’ dhe unë nuk jam i tillë. Nuk më pëlqeu gjithashtu mënyra se si luajtëm nëse e krahasoni me klubet e tjera. Por, ishte ëndrra ime. Nuk mund ta përfundoja karrierën time pa ardhur këtu”.

“Do të më pëlqente t’i bëja gjërat sipas mënyrës sime dhe të kisha sukses. Kjo tregon se Real Madridi është më i madh se çdo gjë tjetër. Është e komplikuar të luash atje. Ndoshta më duhej të stërvitesha më shumë. Gjithashtu kam pasur lëndimet më të këqija në momentet më të këqija”, përfundoi belgu.

Real Madrid sigurisht që është më i madh se çdo lojtar, dhe ata vazhduan të kenë sukses të madh pavarësisht se Hazard u largua. Megjithatë, mund të kishte qenë edhe më mirë nëse ai do të kishte qenë në maksimumin e tij. /Telegrafi/