Note 50S 5G+, telefoni i mençur që mbanë erë

A keni dashur ndonjëherë të kishit një telefon të mençur që mban erë? Infinix beson se shumë janë, ndaj po përgatitet të prezantojë modelin Note 50s 5G+, premiera e të cilit është planifikuar për 18 prill në Indi.

Ky telefon sjell të ashtuquajturën teknologji scent-tech, shkruan GSM Arena.

Është një sistem që lejon çlirimin e aromave nga pjesa e pasme e pajisjes, transmeton Telegrafi.

Teknologjia bazohet në mikrokapsulimin – një proces në të cilin molekulat e aromës mbyllen në kapsula mikroskopike.

Kapsulat janë të ngulitura në pjesën e pasme të kornizës prej lëkure artificiale, dhe aroma lirohet gradualisht dhe jep një përshtypje të lehtë, freskuese.

Duhet të jetë delikate dhe të zgjasë rreth gjashtë muaj, megjithëse intensiteti dhe kohëzgjatja do të varet nga përdorimi dhe kushtet si temperatura dhe lagështia.

CEO i Infinix për Indinë, Anish Kapoor, shpjegoi: “Ne përpiqemi të jemi inovativ. Një risi e tillë është kjo Energizing Scent-Tech. Është si të kesh një telefon të bukur dhe gjithashtu ka erë të mirë. Ka shumë teknologji pas saj. Të gjithë duam të kemi erë të mirë dhe të jemi në një mjedis të këndshëm. Nëse mund të mbajmë diçka që mban erë të mirë në dorë – pse jo”.

Note 50s 5G+ do të vijë në tre ngjyra, por vetëm versioni Marine Drift Blue do të ketë një aromë të integruar.

Nuk dihet ende nëse ky model do të jetë i disponueshëm jashtë Indisë.

Infinix Mobile është një prodhues i telefonave të mençur i themeluar në vitin 2013 nga Transsion Holdings.

Megjithëse kompania është e bazuar në Kinë, pajisjet janë projektuar në Francë dhe qendrat e kërkimit dhe zhvillimit janë të vendosura në Francë dhe Korenë e Jugut.

Infinix është i pranishëm në më shumë se 70 vende të botës, duke përfshirë disa vende evropiane.

Në Evropë, marka është zyrtarisht e pranishme në disa vende, dhe pajisjet janë gjithashtu të disponueshme përmes dyqaneve të shumta online që ofrojnë shpërndarje në të gjithë kontinentin.

Megjithatë, disponueshmëria ndryshon sipas tregut dhe disa modele mund të kufizohen në rajone të caktuara. /Telegrafi/