Njerëzit po shtojnë gjithnjë e më shumë kripë në ujë, duke shpresuar për hidratim më të mirë: A ka kuptim kjo?

Kripa dhe uji janë bërë zgjedhja e parë e shumë njerëzve për pijen e mëngjesit, pasi u përhap në internet historia se kjo pije përmirëson hidratimin e të gjithë trupit

Kripa dhe uji janë pija e re hidratuese magjike e rekomanduar nga influencuesit dhe gjithnjë e më shumë njerëz po shtojnë kripë në gotën e tyre të mëngjesit me ujë. Megjithatë, mund të jetë e rrezikshme.

Influencuesit pohojnë se është mënyra më e mirë për të përmirësuar rutinën tuaj të përditshme dhe se kripa ndihmon në hidratimin, tretjen dhe detoksifikimin më të mirë të trupit.

Një influencues i TikTok-ut madje tha: “Nëse jeni duke pirë ujë të thjeshtë, ndoshta nuk jeni duke u hidratuar siç duhet”. Megjithatë, ekspertët kanë paralajmëruar për marrjen e tepërt të natriumit prej vitesh dhe rekomandojnë që marrja ditore të mos kalojë 2.300 mg.

Sasia e tepërt e natriumit mund të rrisë presionin e gjakut dhe të rrisë rrezikun e goditjes në tru dhe sulmit në zemër.

Megjithatë, disa të tjerë shtojnë deri në dy lugë çaji kripë në ujin e tyre, që është 3.360 mg natrium, më shumë se 1.000 mg mbi sasinë e rekomanduar ditore në vetëm një gotë ujë, transmeton Telegrafi.

Pra, cila është e vërteta? Kripa në ujë përmirëson hidratimin apo mund të dëmtojë shëndetin tuaj? Ekspertët thonë se ky trend është krejtësisht i padobishëm.

View this post on Instagram

A post shared by Dr. Lisa Young 🍴PhD, RDN (@drlisayoung)

Veshkat në mënyrë natyrale largojnë toksinat vetë

“Nuk është e dobishme”, thotë dietologia Lisa Young. Uji i thjeshtë është i mjaftueshëm për hidratim dhe shtimi i kripës madje mund të jetë i dëmshëm për shëndetin.

Sipas Shoqatës Amerikane të Zemrës, marrja e tepërt e natriumit mund të çojë në ënjtje dhe fryrje, shtim në peshë dhe probleme me gjumin. Për më tepër, shumë natriumi mund të jetë i rrezikshëm për grupe të caktuara njerëzish, veçanërisht ata me presion të lartë të gjakut ose probleme me veshkat.

Sa i përket pretendimit se kripa në ujë ndihmon në detoksifikimin e trupit, Young thekson se veshkat tashmë i largojnë vetvetiu në mënyrë natyrale toksinat, ndaj nuk ka nevojë të “ndihmohet” më tej organizmi.

Po në lidhje me tretjen?

Young thotë se çdo përfitim ka të ngjarë të vijë nga vetë uji, jo nga kripa.

Pse njerëzit besojnë se kripa ndihmon në hidratimin?

Ky trend ka të ngjarë të lidhet me një tjetër obsesion – elektrolitet.

Elektrolitet, si natriumi, kaliumi dhe magnezi, janë minerale të rëndësishme që ndihmojnë trupin të funksionojë siç duhet. Megjithatë, sipas Yang, shumica e njerëzve i marrin nga ushqimi dhe nuk kanë nevojë t’i konsumojnë ato shtesë përmes pijeve.

Për shembull, natriumi gjendet në bukë, salca dhe erëza, ndërsa frutat dhe perimet janë burime të pasura të kaliumit dhe magnezit.

Të vetmit njerëz që kanë nevojë për elektrolite shtesë janë atletët që stërviten intensivisht dhe për një kohë të gjatë (p.sh. vrapues maratonë, çiklistët në distanca të gjata) dhe njerëzit që vuajnë nga hiponatremia (natriumi i ulët në gjak), i cili mund të jetë rezultat i disa medikamenteve.

“Është pothuajse e pamundur të mos marrësh mjaftueshëm natrium përmes dietës”, thotë Young. “Pirja e ujit të thjeshtë është mjaft e mjaftueshme.”

Nëse dëshironi të shtoni kripë në ujin tuaj, Yang rekomandon jo më shumë se një të tetën e një luge çaji. Por nëse jeni të shqetësuar për marrjen e elektroliteve, një pije me elektrolit është një zgjedhje më e mirë se uji i kripur, sepse përmban minerale të tjera, si kalium dhe magnez, jo vetëm natrium.

Marrja e natriumit

Natriumi është i rëndësishëm për rregullimin e lëngjeve në trup, por ne tashmë e marrim mjaftueshëm atë përmes dietës sonë. Pirja e ujit të kripur mund t’ju kalojë lehtësisht kufirin e rekomanduar.

Burimet më të mëdha të natriumit në ushqim janë mishrat e përpunuar (proshutë, sallam, djathëra, patate të skuqura dhe ushqime të ngjashme, salcat e gatshme dhe salcat e sallatave, buka, ushqimet e gatshme të ngrira, supat, karkalecat dhe ushqimet e shpejta si pica. Disa argumentojnë se njerëzit që hanë kryesisht ushqime të freskëta dhe të papërpunuara nuk konsumojnë mjaftueshëm natrium. Megjithatë, Yang e hedh poshtë këtë si të pasaktë.

“Dieta ime përbëhet nga 90% drithëra të plota dhe marr mjaft natrium”, thotë ajo. “Kripa dhe sheqeri janë konservansët më të zakonshëm – ne i konsumojmë shumë më tepër sesa kemi nevojë”. /Telegrafi/