Një aeroplan pasagjerësh që fluturonte nga Norvegjia në Holandë doli nga pista gjatë një ulje emergjente, incidenti i tretë i tillë në 24 orë, pas një në Korenë e Jugut ku 179 persona "supozohet" të vdekur.
"Fluturimi KL1204, një Boeing 737-800, doli nga ana e djathtë e pistës 18, pasi u ul në aeroportin Oslo Torp Sandefjord. Fluturimi u devijua atje menjëherë pas ngritjes nga aeroporti i Oslos (OSL)", sipas një deklarate të lëshuar nga Royal Dutch.
Pilotët zgjodhën të devijojnë aeroplanin në aeroportin Sandefjord Torp, 110 kilometra nga Oslo, për një ulje emergjente.
Megjithëse aeroplani u ul i sigurt, ai rrëshqiti nga pista dhe u ndal në një zonë me bar, ngjitur me pistën, duke u raportuar se ishte një problem në sistemin hidraulik si shkak i incidentit.
Brenda aeroplanit gjendeshin 176 pasagjerë dhe gjashtë anëtarë të ekuipazhit në bord që nuk pësuan lëndime, ndërsa një hetim ka nisur për incidentin.
Më herët, një fluturim i Air Canada u detyrua të bënte një ulje emergjente në aeroportin ndërkombëtar të Halifax, pasi kishte gjithashtu një defekt në pajisjen e uljes. /Telegrafi/
