Një muaj paraburgim për të miturin që shtiu me armë në “Beer Fest”

Gjykata Themelore në Prishtinë konfirmon se personit që shtiu me armë në “Beer Fest” i është shqiptuar masa e paraburgimit prej një muaj.

Në një njoftim për media kjo Gjykatë njofton se Gjykata Themelore-Departamenti për të Mitur në çështjen  juridiko-penale ndaj miturit H.V për shkak të dyshimit të bazuar të kryerjes së veprave penale “Shkaktim i rrezikut të përgjithshëm” dhe veprës penale “mbajtje në pronësi, kontroll ose posedim të paautorizuar të armëve”, duke vendosur lidhur me kërkesën e Prokurorisë Themelore-Departamenti për të mitur për caktimin e paraburgimit mbajti seancën dëgjimore, ku ka shqiptuar masën e paraburgimit e cila mund të zgjasë më së shumti deri në një muaj, përkatësisht prej datës 19.08.2016 deri më datën 18.09.2016.

“Ankesa kundër këtij aktvendimi nuk e ndalon ekzekutimin e aktvendimit”, thuhet në njoftim.

I mituri H.V, më 29 korrik në sheshin “Nënë Tereza” dyshohet se ka shtënë disa herë me armë, me ç‘rast qytetarët e tubuar kanë filluar të ikin dhe gjatë ikjes një numër i madh i tyre kanë marrë lëndime trupore të natyrave të ndryshme, me ç’rast ekziston dyshimi i bazuar se ka kryer veprën penale shkaktim i rrezikut të përgjithshëm dhe veprën penale mbajtje në pronësi, kontroll, ose posedim të paautorizuar të armëve. /Telegrafi/