NISMA pranon kushtet e Xhavit Drenorit, pritet nënshkrimi i marrëveshjes

Oferta e ish-kandidatit të pavarur për kryetar të Drenasit, Xhavit Drenori drejtuar dy kandidatëve të cilët do të garojnë në balotazh për kryetar të Drenasit, është e pranueshme për Nismën për Kosovën. Këtë e ka bërë të ditur, anëtari i Kryesisë së kësaj partie, Shyqyri Bytyqi.

Ky i fundit, i cili është edhe pjesë e Shtabit Zgjedhor në Drenas ka thënë se pikat e propozuara nga Drenori janë të ngjashme me ato qe i ka shpalosur Nisma gjatë fushatës.

“Publikisht i përkrahim të gjitha pikat dhe ne jemi të gatshëm të pranojmë kushtet e Drenorit.  Ato janë pika të pranueshme për neve dhe normal që i pranojmë”, ka thënë Bytyqi për ‘Indeksonline’.

Bytyqi i ka bërë thirrje Drenorit që të jetë pjesë e qeverisjes komunale në Drenas, nëse vlerëson se duhet të jetë pjesë e ndryshimit.

Se propozimi i tij nuk është kundërshtuar të partia e Fatmir Limajt e ka pranuar vet Xhavit Drenori. Ky i fundit ka thënë për ‘Indeksonline’, se vërehet një vullnet i mirë për nënshkrimin e këtij propozimi.

“Unë tash për tash nuk mund të them me saktësi se çka do të ndodhë, sepse mund të demantohet, por mund të them se vërehet një vullnet i mirë. Kemi pas një komunikim të mirë, por PDK me gjasë po dëshiron të negociojë më gjatë”, ka thënë Drenori.

Oferta e tij përmban gjashtë pika. Në këtë propozim ai nuk kërkon qe të jetë pjesë e qeverisjes, por qe nga cilësia e asamblistit të monitorojë mbarëvajtjen e marrëveshjes.

Drenori ka kushtëzuar dy partitë që sot deri në ora 12:00, të pranojnë dhe të nënshkruajnë arritjen e kësaj marrëveshje.