Nis protesta për tërheqjen e 30 për qind të mjeteve nga Trusti

Ka nisur të mbahet protesta e punëtorëve të KEK-ut, të cilët po kërkojnë lejimin e tërheqjes së 30 për qind të mjeteve nga Trusti.

Protesta ka nisur me thirrjen “Pro tërheqjes së 30 për qind të Trustit, duam paratë tona”.

Kryetari i Sindikatës së KEK-ut, Nexhat Lluminca, tha se gjendja ekonomike në vend është e vështirë, andaj imponohet edhe kërkesa për tërheqjen e kursimeve.

“I lus gjithë deputetët e popullit të votojnë për popullin në këto ditë të vështira”, deklaroi Llumnica.

Lexo po ashtu Sindikatat në protestë para Kuvendit dhe Qeverisë së Kosovës, kërkojnë miratimin e tërheqjes së kursimeve nga Trusti

Pjesëmarrës në këtë protestë ishin edhe zyrtarë të Bashkimit të Sindikatave të Pavarura të Kosovës, të cilët kërkuan tërheqjen e parave nga Trusti.

Ndërkohë, deputeti i Partisë Demokratike të Kosovës, Bekim Haxhiu, i cili ka iniciuar ndryshimin e këtij projektligji, ftoi gjithë deputetët të mbështesin këtë nismë.

Seanca plenare e Kuvendit, ku ishte në rend të ditës ndryshimi i Projektligjit për Fondet Pensionale që mundëson tërheqjen e mjeteve nga Trusti, është ndërprerë dhe pritet të vazhdojë në orën 13:00./Telegrafi/