“Takimet e mia me…”, Blendi Fevziu ndalon në Prishtinë për ‘takimin’ e radhës me lexuesit e librit të tij më të ri

Në një mbrëmje të mbushur me kulturë dhe refleksion, gazetari dhe autori i njohur Blendi Fevziu erdhi në Prishtinë për të promovuar librin e tij më të ri, “Takimet e mia me…” në Librarinë “Dukagjini”.

Në një përurim që solli së bashku shumë të ftuar nga fusha të ndryshme, Fevziu ndau detaje rreth veprimtarisë së tij më të fundit fundit letrare, e cila vë në pah përvojën e tij me personalitete të shquara kombëtare nga të gjitha trevat shqiptare.

Libri i Fevziut është një koleksion i bisedave dhe përvojave me njerëz që kanë lënë gjurmë të thella në historinë dhe kulturën shqiptare. Përtej jetës profesionale të gazetarit, ai sjell një dimension më njerëzor të personazheve që janë formësuar nga realiteti shqiptar.

Gjatë një interviste të shkurtër për Telegrafin, të zhvilluar në margjinat e premierës së librit, Blendi Fevziu theksoi rëndësinë e veprës së tij:

“Është një pjesë e rëndësishme e historisë së shqiptarëve. Është një pjesë e rëndësishme e personazheve që kanë ndikuar në jetën e tyre në Kosovë, apo Shqipëri. Janë personazhe me të cilët ata kanë jetuar ose në një farë mënyre kanë ndikuar jetën e tyre kur kanë qenë më të rinj apo edhe tani. Kështu që është një shikim më njerëzor i këtyre personazheve”, tha autori i emisionit “Opinion”.

Përmes “Nga takimet e mia me…”, lexuesit kanë mundësi të zbulojnë histori personale dhe të ndërtojnë një lidhje më të thellë me figura që ndoshta i njohin vetëm përmes ekranit ose faqeve të gazetave. Ky libër synon të jetë një urë midis publikut dhe atyre që kanë kontribuar në mënyra të ndryshme në shoqërinë shqiptare, duke i sjellë këta të fundit më afër me anë të rrëfimeve dhe përvojave të përbashkëta.

“Faqet e këtij libri janë një dëshmi e kohës në të cilën jetojmë dhe një hulumtim i thellë i një periudhe tranzicioni, ku personalitetet kombëtare u bënë dëshmitarë, por edhe aktorë të ndryshimeve të mëdha”, shtoi Fevziu.

Në një kohë kur historitë personale dhe ato kolektive janë më të rëndësishme se kurrë, “Nga takimet e mia me…” vjen si një kontribut i çmuar në ruajtjen e kujtesës kolektive dhe në kuptimin e gjurmëve që shumë individë të çmuar lanë në rrugëtimin e një kombi. /Telegrafi/

Libri “Takimet e mia me…” i autorit Blendi Fevziu, është i disponueshëm nga tani në të gjitha pikat e shitjes së Librarisë “Dukagjini”.