Nesër bëhet lansimi i projektit “Prishtina Buses”

Projekti “Prishtina Buses” i cili është realizuar nga një grup të rinjsh Kosovar dhe disa anëtarë të organizatës FLOSSK, kishte për qëllim krijimin e një harte të linjave të autobusëve që qarkullojnë nëpër Prishtinë duke përfshirë oraret, nisjet, çmimet dhe informata të ngjashme.

Pasi që Prishtina nuk ka një sistem të mirëfilltë të informimit të qytetarëve rreth linjave të autobusëve që qarkullojnë nëpër qytet, pjesëmarrësit e projektit me të drejtë zgjodhën për të zgjidhur një problem i cili sjell huti jo vetëm tek banorët e qytetit por edhe tek vizitorët e shumtë që vijnë për qëllime të ndryshme në Prishtinë.

Projekti u zhvillua ashtu që pjesëmarrësit në ekipe nga dy vet ndiqnin linjat e autobusëve me një pajisje GPS Garmin, ndërsa pasi që kanë marrë informatat ato për të gjitha rrugët dhe stacionet ato i bartën në një kompjuter që kishte një softuer për hartat elektronike. Gjatë realizimit të projektit gjithashtu janë mbledhur edhe informata të ndryshme nga personeli i autobusëve rreth orareve të operimit të autobusëve respektivisht linjave përkatëse.

Kostoja e projektit ishte 500 Euro ndërsa ai ishte i ndihmuar nga UNICEF Innovation Lab, ndërsa pjesëmarrësit në projekt shpresojnë se ai mund të jetë frymëzim për administratën publike për të mbështetur projektet tjera të këtij lloji në qytetet tjera në Kosovë.

Me rastin e prezantimit të projektit do të mbahet edhe një eveniment ku do të ketë edhe diskutimet rreth planeve të ardhmes së këtij projekti. Prezantimi do të bëhet në zyrat e Unicefit në Prishtë duke filluar nga ora 18:00, e për më shumë informata mund të vizitoni faqen e eventit në Facebook. /Telegrafi/