“Në tregti si në hokej, ne do të fitojmë”: Kryeministri i ardhshëm i Kanadasë zotohet të fitojë luftën tregtare me Trump

Mark Carney është zgjedhur lider i Partisë Liberale të Kanadasë në një garë shumë mujore – dhe me shumë gjasa për të zëvendësuar Justin Trudeau.

Ai tani pritet të udhëheqë partinë në zgjedhjet e ardhshme federale – të cilat duhet të mbahen para tetorit, por mund të thirren shumë më herët – ku ai ka të ngjarë të përballet me konkurrencë të ashpër nga partia Konservatore, e cila aktualisht kryeson në sondazhe, përcjell Telegrafi.

Ndërsa Carney do të marrë detyrën menjëherë si udhëheqës i Partisë Liberale, Trudeau do të mbetet si kryeministër i Kanadasë për një periudhë tranzitore ende të pazbuluar deri më tani.

Dhe një nga çështjet më të mëdha në “agjendën” e menjëhershme të Carney-t do të jetë përkeqësimi i marrëdhënieve të vendit me Shtetet e Bashkuara të Amerikës.

Presidenti i SHBA-së, Donald Trump ka fajësuar vazhdimisht Kanadanë për imigracionin e paligjshëm në SHBA, kërcënoi se do ta kthejë Kanadanë në një shtet të 51-të dhe do të vendosë tarifa të larta për importet kanadeze, të cilat Shtëpia e Bardhë thotë se janë të nevojshme për të frenuar rrjedhën e fentanilit mbi kufijtë e saj.

Në komentet e tij të para pas rezultatit të votimit, Carney iu referua tensioneve me SHBA-në, duke thënë se qeveria e tij do të “krijojë marrëdhënie të reja tregtare me partnerë të besueshëm tregtarë”.

Ai gjithashtu u zotua të mbajë tarifat hakmarrëse ndaj SHBA-së “derisa amerikanët të na tregojnë respekt”.

“Kërcënimet e reja kërkojnë ide të reja dhe një plan të ri”, tha ai në konventën e Partisë Liberale të dielën.

Duke folur për planet tarifore të administratës Trump, Carney tha për presidentin amerikan: “Ai po sulmon familjet, punëtorët dhe bizneset kanadeze dhe ne nuk mund ta lëmë të ketë sukses dhe nuk do ta bëjmë”.

“Në tregti si në hokej, Kanadaja do të fitojë”, shtoi ai.

Efektet e marrëdhënieve të tensionuara me SHBA-në janë parë edhe në shoqërinë kanadeze, përfshirë edhe te tifozët në lojërat e NHL dhe NBA në Kanada, disa prej tyre madje duke brohoritur kundër himnit kombëtar të SHBA-së.

Carney tani do të përballet me liderin konservator Pierre Poilievre, i cili më parë është krahasuar me Trump, por tani kërkon të distancohet nga lideri amerikan, duke përsëritur në një konferencë shtypi në fillim të kësaj jave se ai nuk është “MAGA”. /Telegrafi/