Në Serbi konfiskohet mbi gjysmë toni marihuanë, policia thotë se hyri nga Kosova

Policia e Nishit ka arrestuar sot një person në veturën e të cilit janë gjetur 520 kilogramë marihuanë, për të cilën thuhet se ka hyrë nga Kosova.

Në njoftimin e MUP-it serb thuhet se “zyrtarët policorë kanë ndaluar një kamion në Nish, i cili drejtohej nga N.I. (46 vjeçar), gjatë kontrollit kanë gjetur 134 pako me marihuanë, e cila dyshohet se paraprakisht ka mbërritur në Kosovë përmes Shqipërisë dhe ka qenë e destinuar për shitje të mëtejshme në territorin e Serbisë”.

Sipas njoftimit të MUP-it, transmeton N1, të dyshuarit N.I. i është caktuar masa e ndalimit prej 48 orësh, ndaj të cilit  do të ngritet kallëzim penal, dhe do të dërgohet në Prokurorinë e Lartë të Nishit, .

Ministri i Punëve të Brendshme, Aleksandar Vulin, ka uruar  policinë për këtë aksion dhe ka bërë të ditur se “lufta e ashpër” e policisë me dilerët e drogës do të vazhdojë, përcjell Tellegrafi.

“Pavarësisht nëse Serbia është një vend tranzit apo destinacion përfundimtar për shitjen e narkotikëve, me vendosmëri dhe luftë të njëjtë ne do të arrestojmë këdo që importon dhe shet drogë në vendin tonë. Serbia nuk është dhe nuk do të jetë vend i sigurt për shitjen e lëndëve narkotike apo vend i sigurt për shpërndarjen e tyre të mëtejshme. Serbia nuk do të jetë kurrë një vend i sigurt për narko dilerët dhe trafikun e drogës”, ka thënë Vulin.

Ministri Vulin theksoi se çdo konfiskim i lëndëve narkotike është një sukses i madh dhe një fitore e madhe për policinë dhe bëri të ditur se marihuana nuk do të legalizohet në Serbi. /Telegrafi/