Myslimani në Ohër dhuron pako humanitare për të krishterët me rastin e festës së Buzmit

Toleranca fetare në RMV është mjaft e shprehur, ndërsa për këtë ka treguar edhe Ndërmarrja Publike në Ohër që menaxhon me tregjet. Në një postim në Facebook të kësaj ndërmarrje, thuhet se një qytetar i besimit islam, me rastin e festës krishtere Buzmi, ka dhuruar pako humanitare për qytetarët e besimit krishter.

“Jeta multifetare në Maqedoni ka rrënjë të thella, por pikërisht gjatë festave ajo është më e dukshme. Tradita e respektimit të njëri-tjetrit pa dallim feje vazhdon. Në frymën e festës më të madhe të krishterë, Krishtlindjeve, besimtarët e besimit mysliman shprehin respekt për fqinjët dhe bashkëqytetarët e besimit të krishterë”.

“Një shembull të tillë të lidhjes së ndërsjellë të qytetarëve përmes besimeve të ndryshme fetare na e tregoi sot bashkëpunëtori dhe miku ynë shumëvjeçar Meti Zhaku, i cili shpërndau pako me fruta dhe perime për qytetarët e besimit ortodoks. Humanizmi, marrëdhëniet harmonike mes njerëzve dhe kërkimi i paqes dhe mirëqenies janë parimet bazë të Islamit. Urimet më të mira për këtë dashamirës!”, thuhet në postim.

Ndryshe, besimtarët krishterë ortodoks në RMV sot festojnë Buzmin, një ditë para festës së madhe Lindjen e Krishtit – Krishtlindjet.

Buzmi tradiconalisht shënohet me tubim para Katedrales “Shën Klimenti i Ohrit” në Shkup, në organizim të Shoqatës civile “Bordi për shënim tradicional të Buzmit”./Telegrafi/