Mustafa: Institucionet tona duhet të punojnë më shumë për sistemin e arsimit

Kryeministri në detyrë, Isa Mustafa ka uruar të gjithë nxënësit me rastin e fillimit të vitit të ri shkollor, duke thënë se arsimimi cilësor, avancimi i dijes dhe përgatitja bashkëkohore profesionale janë parakushte themelore për zhvillimin e vendit.

Mustafa në një postim në rrjetin social Facebook shkruan se institucionet duhet të punojnë më shumë për të krijuar kushte duke përkrahur në çdo formë sistemin e arsimit dhe edukimit, gjë që do të ndikojë drejtpërdrejt edhe në vlerësimet ndërkombëtare për vendin.

Lexoni të plotë postimin e Mustafës në Facebook:

“Të dashur nxënës dhe mësimdhënës të Kosovës,

Urimet më të përzemërta për fillimin e vitit të ri shkollor në shkollat fillore dhe të mesme.

Arsimimi cilësor, avancimi i dijes dhe përgatitja bashkëkohore profesionale janë parakushte themelore për zhvillimin e vendit tonë.

Krijimi i brezave të rinj, që arritjet e tyre në të gjitha fushat, i bazojnë në dije dhe aftësi intelektuale, na garanton mirëqenie e zhvillim afatgjatë.

Institucionet tona duhet të punojnë më shumë për të krijuar kushte duke përkrahur në çdo formë sistemin e arsimit dhe edukimit, gjë që do të ndikojë drejtpërdrejt edhe në vlerësimet ndërkombëtare për vendin.

Urime dhe ju priftë e mbara!”. /Telegrafi/