Monchi tregon sa kushtoi Salah: Liverpooli pagoi afro 50 milionë euro për egjiptianin

Roma ishte detyruar ta shiste Mohamed Salahun te Liverpooli në verën e kaluar për shkak të presionit të UEFA-s në lidhje me rregullat financiare – ka bërë të ditur drejtori sportiv i klubit italian Monchi.

Pas një periudhe zhgënjyese të Chelsea, futbollisti egjiptian kaloi fillimisht te Fiorentina dhe pastaj te Gillorossët duke e rikthyer reputacionit e tij si lojtar klasi.

Dhe në verën e kaluar, 25-vjeçari nënshkroi për Liverpoolin duke u kthyer në Ligën Premier për të nisur mbretërimin e tij.

Ai i ka shënuar 43 gola në të gjitha garat këtë sezon, ndërsa tashmë është shpallur ‘PFA Lojtari i Vitit’, si futbollisti më i mirë në futbollin anglez.

https://www.youtube.com/watch?v=nsSxtCZC7vs

Lexo po ashtu Të gjitha lajmet për Mohamed Salah

Pas transferimit nga Roma, Liverpooli kishte bërë të ditur se e ka blerë Salahun për 42 milionë euro, mirëpo Monchi thotë se ka arritur të nxjerrë më shumë para nga klubi anglez.

“E kam shitur më shumë se 42 milionë euro. Duhej ta shisnim. Nuk kishim asnjë opsion tjetër, pos ta shisnim Salahun para 30 qershorit”.

“Po të mos e bënim atë, atëherë nuk do të ishim këtu duke luajtur në gjysmëfinale të Ligës së Kampionëve, pasi UEFA ishte duke na monitoruar nga afër”.

“Kur arrita, oferta (nga Liverpooli) ishte 30 milionë euro, mirëpo ne ia dolëm ta ngritnim shifrën deri në afro 50 milionë euro së bashku me bonuset”.

“Aq mund të bënim. Pastaj tregu u çmend me Neymarin (që u transferua te Paris Saint-Germaini për 222 milionë euro) dhe (Philippe) Coutinhon e (Ousmane) Dembelen (të dy të transferuar te Barcelona)”.

“Ai (Salah) ka kaluar një sezon të jashtëzakonshëm. E urojmë Liverpoolin për blerjen e tij. Ne duhej ta shisnim dhe lojtari donte të largohej”, ka treguar Mochi. /Telegrafi/

https://www.youtube.com/watch?v=04kalgoceTM