Likaj për fillimin e vitit shkollor: Nis në dy faza, do të jemi në terren për ta përcjellë gjendjen

Ministri i Arsimit dhe Shkencës, Ramë Likaj ka thënë se të gjithë zyrtarët komunal, ata të ministrisë si dhe inspektorët do të jenë gjatë gjithë kohës në terren për të përcjell gjendjen për fillimin e vitit të ri shkollor.

Ministri Likaj këtë deklaratë e bëri të ditur pas takimit që pati me përfaqësuesit e SBAShK-ut dhe kryetarët e komunave, ndërsa njoftoi se viti i ri shkollor do të fillojë në dy faza.

“Faza e parë fillon më 14 shtator 2020. Me këtë datë mësimin e fillojnë të gjithë fëmijët e klasës parafillore dhe nxënësit e klasave 1,2,3,6,10 në të gjitha shkollat e Republikës së Kosovës. Klasat 4 dhe 5 vijojnë mësimin në shkollë (sipas skenarit A) ose si mësim i kombinuar (Skenari B mësim në distancë dhe mësim online)….”.

Sipas tij, të gjithë personat që marrin pjesë në orarin mësimor janë të obliguar t’i bartin maskat, ndërsa bëri të ditur se mësimdhënësit në vazhdimësi do të kenë testime gjatë tërë procesit.

“Kemi bërë reduktim të njësive mësimore, pa e dëmtuar cilësinë e mësim nxënies. E kemi bërë një testim pilot me IKSHKP me pa gjendjen ekzistuese, por në vazhdimësi do të ketë testime të mësimdhënësve gjatë tërë procesit. Me udhëzues që i kemi është paraparë edhe ulja e nxënësve. Gjatë gjithë kohës stafi do të jetë në terren, edhe inspektoratet, zyrtarët komunal të arsimit dhe zyrtarët e ministrisë do ta përcjellin gjendjen”, ka thënë Likaj.

Ministri Likaj po ashtu shpjegoi se mësimdhënësit të cilët kanë probleme shëndetësore do të lirohen nga procesi mësimor.

“Është një buxhet shtesë në kuadër të pakos që ka miratuar Qeveria e Republikës së Kosovës. Janë mbi 300 mësimdhënës që kanë probleme shëndetësore, ata do të lirohen nga procesi mësimorë. Për ata që janë më të moshuar dhe paraqiten probleme shëndetësor ka norma shtesë”, ka thënë ndër të tjera ministri Likaj. /Telegrafi./