Ministri Krasniqi merr mbështetjen e Italisë për procesin e përafrimit të Kosovës në BE

Ministri i Administrimit të Pushtetit Lokal, Elbert Krasniqi i shoqëruar nga ambasadorja e Republikës së Kosovës në Itali, Lendita Haxhitasim ka takuar sekretaren e Komisionit për Bilancin, Donatella Conzatti dhe zëvenëspresidenten e Komisionit të Jashtëm, Laura Gravini me të cilat ka biseduar për temat me interes të ndërsjellë.

Në njoftimin për media thuhet se gjatë këtij takimi u diskutuan tema me interes të ndërsjellët për të cilat parlamenti italian mund të zhvilloj një rol të rëndësishëm në mbështetje të çështjeve si kandidimi i Republikës së Kosovës në Këshillin e Evropës, liberalizimi i vizave si dhe konsolidimi i kontekstit socio-ekonomik më fokus investimet.

Ministri Krasniqi theksoi gatishmërinë për të mbështetur kompanitë italiane të cilat planifikojnë të investojnë në tregun e Kosovës, që ofron fuqi punëtore të re dhe të kualifikuar.

Në njoftim bëhet e ditur se Conzatti theksoi se Italia e mbështet rrugëtimin e Republikës së Kosovës drejt BE-së, ashtu si dhe drejt Këshillit të Evropës, pasi Kosova po dëshmon se është në rrugën e duhur drejt reformave, zhvillimit dhe promovimit të demokracisë dhe të drejtave të njeriut.

“Kjo duhet të jetë një arsye e mirë për të shtyrë institucionet politike, ekonomike dhe kulturore për të krijuar mundësi të reja për të shkëmbyer përvojat në mes të dy vendeve të cilat jetojnë në simbiozë perfekte”. /Telegrafi/