Milatoviq pas fitores në zgjedhjet presidenciale në Mal të Zi: Sonte është nata të cilën e kemi pritur më shumë se 30 vjet

“Sonte është nata të cilën e kemi pritur më shumë se 30 vjet dhe le të na sjellë fat kjo fitore”.

Kjo është fjalia që ka thënë fillimisht kandidati i “Evropa tani”, Jakov Milatoviq, i cili fitoi raundin e dytë të zgjedhjeve presidenciale – sipas rezultateve preliminare – në Mal të Zi.

Sipas tij, Mali i Zi sonte bëri një hap vendimtar përpara, përcjell Telegrafi.

“Ai i tha një lamtumirë vendimtare regjimit të vjetëruar të (Milo) Gjukanoviqit dhe bëri një hap përpara drejt një Mali të Zi më të pasur, më të ndritshëm, më të barabartë, të përjetshëm dhe evropian…”, ka shtuar ai.

Siç ka shtuar ai, kjo është “forca e Malit të Zi të përbashkët”.

Ne i thamë, ka thënë më tej Milatoviq, sonte “lamtumirë vendimtare krimit dhe korrupsionit”.

Gjithashtu, shtoi ai, “nuk do të ketë më kurrë grindje nga Mali i Zi ndaj asnjë vendi të Ballkanit Perëndimor, fqinjëve tanë”.

“Mali i Zi dëshiron marrëdhënie më të mira me të gjitha vendet e Ballkanit Perëndimor. Ne duam harmoni dhe përparim të përbashkët në Ballkanin Perëndimor evropian”, theksoi Milatoviq.

Ndryshe, sipas rezultateve preliminare, kundërkandidati i presidentit të deritanishëm të Malit të Zi ka fituar shumicën e votave, në raundin e dytë të zgjedhjeve.

Sipas mediave vendase, të drejtë vote në zgjedhjet presidenciale patën 542.154 qytetarë. Deri në orën 20:00, kishin votuar 70.7% ose rreth 383,300 votues.

Ndërkohë një reagim ka ardhur edhe nga deri tani presidentit të Malit të Zi, Milo Gjukanoviq, i cili ka pranuar humbjen nga kundërkandidati i tij. /Telegrafi/