Mikel Arteta tha se beson se Arsenali ka ndjekur ‘100 për qind’ proceset e duhura lidhur me Thomas Partey, pas akuzave për përdhunim ndaj ish-lojtarit të ‘Topçinjve’. Më 4 korrik, Policia Metropolitane njoftoi se Partey është ngarkuar me dy akuza për përdhunim që lidhen me një grua, tri akuza për përdhunim që lidhen me një grua tjetër, dhe një akuzë për sulm seksual që lidhet me një grua të tretë. Këto ngjarje raportohet se kanë ndodhur midis viteve 2021 dhe 2022. Akuzat u ngritën ndaj mesfushorit nga Gana pas një hetimi nga detektivët, i cili filloi në shkurt të vitit 2022. Partey pritet të paraqitet në Gjykatën e Westminster më 5 gusht, të martën.
Partey u arrestua për herë të parë nën dyshimin për përdhunim në korrik 2022, dhe çështja iu dorëzua Prokurorisë së Kurorës në dhjetor 2024. Partey, i cili sipas ligjit të Mbretërisë së Bashkuar nuk mund të përmendej me emër deri në njoftimin e akuzave muajin e kaluar, vazhdoi të luante për ekipin e parë të Arsenalit para se të lirohej nga klubi me përfundimin e kontratës së tij më 1 korrik. “Klubi ishte shumë i qartë në deklaratën e tij. Ka shumë çështje ligjore shumë të komplikuara, prandaj nuk mund të komentoj për asnjë prej tyre”. Ai u pyet nëse ishte i sigurt që klubi kishte ndjekur proceset e duhura, dhe ai u përgjigj: “100 për qind.”/Telegrafi/
