Mike Tyson dëshiron t’i kthehet ringut dhe të ndeshet në meçe me tre ose katër raunde

Ish-kampioni i padiskutueshëm i botës në kategorinë e peshave të rënda në boks, Mike Tyson, është duke mëndur që t’i vë dorëzat, të kthehet në ring dhe të zhvillojë meçe.

Legjenda amerikane e boksit zhvilloi 58 duele gjatë karrierës së tij, duke regjistruar 50 fitore (44 me nokaut), gjashtë humbje dhe dy përballje u mbyllën pa fitues.

Ai mban rekordin si kampioni më i ri i botës në peshat e rënda (20 vjeçar në vitin 1986), ndërsa u pensionua përgjithmonë nga boksi në vitin 2005 pasi pësoi humbje nga kundërshtarë që nuk ishin të nivelit të tij.

53-vjeçari mendon të përgatitet fizikisht për t’u ndeshur sërish në meçe që do të zgjasin tre ose katër raunde e që nuk do të jenë të nivelit profesional.

Lexo po ashtu Ana e errët e Mike Tyson: Nga orgjitë me nënat e atyre që u jepte para, deri te fantazia e shfrenuar për t’ia shpërthyer dikujt trurin

“Mendoj se do t’i zhvilloj disa meçe përgatitore dhe do të kthehem në formë”, ka thënë Tyson gjatë një bashkëbisedimi me reperin T.I. duke shtuar se përfitimet do të shkonin për qëllime bamirëse.

Duelet e karakterit joprofesional mund të jenë fitimprurëse në kohën moderne. Natën e Vitit të Ri 2018, Floyd Mayweather përfitoi nëntë milionë dollarë kur e nokautoi tri herë brenda një raundi kikbokserin japonez, Tenshin Nasukawa. /Telegrafi/