Mentor Haziri dhe një “Zemër e vrarë”, këngëtari flet rreth projektit të ri dhe angazhimeve në muzikë (Foto)

Është shumë i pëlqyer për stilin e tij dhe muzikën që bën.

Këngëtari Mentor Haziri ka sjell gjithmonë këngë të veçanta për publikun, kryesisht të zhanrit rock, gjersa një projekt të tillë, këngëtari është duke e realizuar së fundmi.

“Kënga titullohet ‘Zemër e vrarë’, e cila është realizuar në studion e kompozitorit Gent Mytaraj në Tiranë, e kam punuar në fakt para dy viteve, por tani e kompletova me audio dhe klip”, tha Mentor Haziri gjatë një bisede për Telegrafin.

Në vazhdimësi, këngëtari shpalosi tematikën e këngës së tij të re, e cila që nga titulli na asocion në dashuri.

“Unë në fakt kam realizuar muzikën dhe tekstin e kësaj kënge, e cila trajton temën e dashurisë. I këndoj një dashurie, që sa herë e këndoj këngën, më del para pamja e saj”, tha më tej këngëtari Haziri.

Ditë më parë përfunduan edhe xhirimet e këtij klipi me përcjellje të Telegrafit, teksa në vazhdimin e intervistës, Mentori tregon se si kanë shkuar në tërësi xhirimet.

“Këngës i kemi realizuar edhe klipin, xhirimet i kemi kryer te Rruga B në Prishtinë te grafitet, pasi janë freskia e kryeqytetit dhe kemi dashur që të tregojmë edhe anën urbane të Prishtinës me këto pamje. Klipi është realizuar nga produksioni PinkMoon Creative, dhe është mjaft i veçantë pasi është një kuadër”.

Në përfundimin e bisedës, këngëtari tregoi se kur do të kenë mundësinë fansat që ta shohin këtë klip, dhe çfarë projektesh tjera priten prej tij.

“Kënga shpresoj se del nesër ose pasnesër, pasi që ende po punojmë në montazhë deri sa të përfundojmë. Projekte kam plot e për plot në mendje, por që do vijnë dalëngadalë një e nga një”, përfundoi Mentor Haziri në Telegrafin.

Lexo po ashtu Të gjitha lajmet nga Estrada Shqiptare

Ekipi i Telegrafit ka përcjell nga afër xhirimet e klipit “Zemër e vrarë” të kryer pak ditë më parë në kryeqytet.

Edhe kësaj radhe, këngëtari Mentor Haziri nuk ka dalë nga stili i tij unik, teksa ky do jetë një klip që do të promovojë mjaft mirë një pjesë urbane të Prishtinës. /Telegrafi/