Mediat botërore: Dasma e dytë mbretërore shqiptare, Princi Leka martohet në një ceremoni luksoze (Foto)

Dasma e Princ Lekës dhe aktores Elia Zaharia që u organizua të shtunën bëri “zhurmë” të madhe në gjithë botën.

Mediat ndërkombëtare u fokusuan në madhështinë e dasmës, duke shkruar artikuj për detaje interesante të dasmës.

Edhe prestigjiozja britanike Daily Mail i ka kushtuar një artikull të gjatë kësaj martese, duke e përshkruar si një dasmë të rrethuar me madhështi, në të cilën ishin të pranishëm rreth 20 familje mbretërore nga e gjithë bota, transmeton lajmi.net.

Sulejman Gjanaj, kryetari i Lëvizjes së Legalitetit, një parti monarkiste e vogël e djathtë që mbështet familjen mbretërore shqiptare, tha për BIRN, transmeton Daily Mail, se dasma do të vërtetojë statusin e mbretërisë shqiptare dhe do të sigurojë trashëgiminë e Mbretit Zog.

“Fakti që mbi 20 familje mbretërore dhe më shumë se 100 aristokratë nga e gjithë bota do të marrin pjesë në dasmë është një tregues i miratimit që ka mbretëria shqiptare”, citohet të ketë thënë Gjanaj.

“Kjo është përgjigja më e mirë për të gjithë ata që kanë falsifikuar historinë e shtetit tonë dhe i kanë mohuar të drejtat legjitime të familjes mbretërore”, ka shtuar ai.

“Familja mbretërore e Shqipërisë u dëbua nga vendi në vitin 1939, pasi vendi u pushtua nga fashistët italianë”, rikujton Daily Mail.