Daut Dauti, Londër
Shqiptarët më së shumti e njohin Sir Noel Malcolmin si autor të librit “Kosovo- A short History” (Kosova - Një Histori e Shkurtër) e cila vepër ndërroi botëkuptimet e vjetra që kishin për Kosovën shkencëtarët dhe vendimmarrësit politikë të botës. Shumica e ekspertëve mendojnë se ky libër është një ndër shkaqet kryesore që shtyu intervenimin e Perëndimit në Kosovë. Kjo vepër është bërë edhe doracak për historianët që merren me çështjen e Kosovës.
Sir Malcolm është autor edhe i librit “Bosnia - A Short History” (Bosnja - Një histori e shkurtër) e cila u botua në vitin 1994, katër vite para librit për Kosovën. Këto dy vepra janë një nga arsyet që Sir Malcolm është shpërblyer me këtë titull të lartë nga mbretëresha britanike.
Ekzistojnë edhe një varg veprash tjera, por edhe roli në gazetari që janë bërë arsye për dhënien e këtij titulli të nderuar. Sir Malcolm ka qenë kryeredaktor i revistës më të njohur politike në botë “The Spectator” dhe kolumnist në “The Daily Telegraph”. Pos gazetarisë shkëlqyese që ushtroi, Sir Malcolm, mbahet mend të jetë edhe kryeredaktori më i ri nga mosha që pati kjo revista “The Spectator” deri sot.
Në qarqet shkencore britanike dhe botërore Sir Malcolm njihet më shumë për vepra tjera. Ai, pa asnjë dyshim, është studiuesi më i mirë i Thomas Hobbesit. Në lidhje me te, Sir Malcolm, ka botuar librin “Aspects of Hobbes” që merret si studimi më i mirë që ekziston për këtë filozof britanik. Por, vepra e tij edhe më e respektuar për Hobbesin është “The Correspondence of Thomas Hobbes” vepër voluminoze në të cilën Sir Malcolm ka punuar dekada me radhë.
Vepra tjera, po ashtu shumë të rëndësishme, janë: “The Origins of English Nonsense” në të cilën bëhet fjalë për llojin e poezinë angleze e cila quhet e pakuptimtë; “Reason of State, Propaganda, and the Thirty Years’ War” ku shtjellohet kjo vepër e përkthyer nga latinishtja në anglisht që e kishte bërë Thomas Hobbes.
Sir Malcolm është autor edhe i këtyre veprave: “George Enrscu: His Life and Music”, “Sense on Sovereignty”, “De Dominis, 1560-1624: Venetian, Anglican, Ecumenist and Relapsed Heretic”, etj.
Sir Malcolm është autor edhe i një vargu të panumërt të punimeve shkencore të botuara nga revistat dhe institutet më të famshme botërore. Ky njeri i madh, me influencën e tij poashtu të madhe, nuk ka pushuar asnjëherë së ndihmuari çështjen shqiptare dhe shqiptarët në Britani të Madhe dhe kudo në botë. /Telegrafi/
