Maqedoni, kursime më shumë se kredi!

Sipas të dhënave të fundit të Bankës Popullore të Maqedonisë, deri në fund të muajit gusht kreditë e përgjithshme kanë shënuar rritje minimale prej 0.2 për qind, edhe atë vetëm te kreditë e destinuara, gjegjësisht kredi konsumatore. Në anën tjetër, të dhënat e raportit zyrtar për periudhën prej 8 muajve të parë të këtij viti, tregojnë për ulje të interesit të qytetareve për marrje të kredive.

Edhe pse bankat komerciale, të cilat veprojnë në Maqedoni, ofrojnë oferta të llojllojshme të kredive, si kredi konsumuese, për banim apo blerje të veturave, interesimi i qytetarëve për të aplikuar për kredi të reja vazhdimisht po bie, shkruan gazeta KOHA. Sipas të dhënave të fundit të Bankës Popullore të Maqedonisë (BPM), deri në fund të muajit gusht, kreditë përgjithshme kanë shënuar rritje minimale prej 0.2 për qind, edhe atë vetëm te kreditë e destinuara, gjegjësisht kredi konsumatore. “Rritje vjetore e kredive të lejuara, të cilat në nivel vjetor shënojnë rritje prej 5.1 për qind, janë kredi konsumatore, gjegjësisht 89 për qind janë kredi të lejuara për pajisje shtëpiake”, thuhet në raportin e BPM-së.

Raporti gjithashtu tregon se edhe kreditë për sektorin korporativ si dhe muajin e mëparshëm shënojnë rritje minimale prej 0,1 për qind për kreditë e marra në valutën e denarit, ndërsa kreditë e lejuara në valutat e huaja, shënojnë ulje prej 0.2 për qind. Raporti i BPM-së, i përgatitur përfundimisht më muajin gusht të këtij viti, nuk sjellë edhe lajme të mira për dilerët apo importuesit legal të veturave të reja.

“Numri i kërkesave për blerje të veturave të reja me kredi deri në fund të muajit gusht është zvogëluar për 9.4 për qind, krahasuar me periudhën e njëjtë të vitit të kaluar. Këto të dhëna, edhe njëherë vërtetojnë shqetësimin e firmave, të cilët në Maqedoni shesin vetura, se kërkesat për blerje të veturave të reja përmes kredive në vazhdimësi po ulet”, përcjell KOHA raportin e BPM-së. Për dallim nga kërkesat e ulëta për kredi konsumatore, banimi apo kredi automobilistike, në raportin e BPM-së thuhet se gjatë 8 muajve të parë të këtij viti bankat kanë rritur limitin e qytetarëve bartës të kartelave kreditore dhe atë për 0.4 për qind, por dhe nëse e krahasojmë në nivel vjetor, kemi ulje mesatarisht prej 0.7 për qind.

“Gjithashtu gjatë muajit qershor të vitit 2017, është regjistruar saldo negative në llogaritë transakcionale të qytetarëve prej 1.3 për qind, ndërsa në nivel vjetor kjo ulje kap shifrën prej 2.9 për qind, ndërsa kreditë e lejuara pa dedikim në nivel mujor, shënojnë ulje prej 0.4 për qind, ndërsa ne nivel vjetor ulja është 1.7 për qind”, thuhet në raportin e BPM-së. Në anën tjetër, derisa të dhënat e raportit zyrtar të BPM-së për periudhën prej 8 muajve të parë të këtij viti, tregojnë për ulje të interesit të qytetareve për marrje të kredive, rritje është regjistruar në nivel mujor te kursimet e qytetarëve në valutave të huaja dhe në denarë prej 0.6 për qind.

“Në nivel vjetor kursimet e depozitave të qytetarëve në valuta të huaja shënojnë rritje prej 5.7 për qind. Rritje të njëjtë shënojnë edhe kursimet e qytetarëve edhe në denarë”, thuhet në raportin e fundit zyrtar të Bankës Popullore të Maqedonisë për 8 muajt e parë të vitit 2017.