Lista e dhjetë lojtarëve më të paguar në Ligën Premier – ka befasi në mesin e emrave

Lista prej dhjetë lojtarëve më të paguar në Ligën Premier është zbuluar aty ku janë të përfshirë disa emra që janë befasi për tifozët.

Nuk është një sekret që lojtarët e Ligës Premier janë në mesin e lojtarëve më të paguar në planet, ani pse Superliga e Arabisë ka joshur disa prej emrave të njohur të futbollit botëror, t’u bashkohen atyre.

Por kush janë lojtarët më të paguar në Ligën Premier?

Nuk është një befasi që Manchester City dominon këtë listë, duke marrë parasysh pagën bazë pa i përfshirë bonuset.

Sipas Capology, Kevin De Bruyne merr një pagë vjetore prej 20.8 milionë eurosh, duke e bërë atë lojtarin më të paguar në elitën e futbollit anglez.

Bashkëlojtari i tij Erling Haaland është i dyti në renditje, duke përfituar plotë 19.5 milionë euro në vit.

Ylli i Liverpoolit, Mohamed Salah, i cili po futet në vitin e tij të fundit të kontratës, përfiton 18.2 milionë euro, ashtu siç fiton edhe mesfushori i Manchester United, Casemiro.

Raheem Sterling i Chelseat paguhet rreth 16.9 milionë euro në sezon, njësoj si Romelu Lukaku, i cili nuk ka luajtur ndonjë ndeshje për klubin londinez që nga 2022 për shkak se u aktivizua në huazim tek Interi dhe Roma.

Dy yjet e tjerë të Man Cityt, Jack Grealish dhe Bernardo Silva, që të dy raportohet se kanë një pagë bazë prej 15.6 milionë euro në vit, ndërsa rivali i tyre i qytetit Marcus Rashford, paguhet 15.6 milionë euro nga Man Unitedi.

Dhe emri i fundit që kompleton listën është Kai Havertz, të cilit iu dha një kontratë prej 14.56 milionë euro në vit kur kaloi nga Chelsea tek Arsenali verën e kaluar./Telegrafi/