Lakers me rikthim të jashtëzakonshëm, mposhtin Dallasin në udhëtim pas disavantazhit prej 27 pikëve

Los Angeles Lakers kanë marrë një fitore spektakolare në udhëtim te Dallas Mavericks në American Airlines Center.

Përkundër se skuadra vendase kishte epërsi prej 27 pikëve në çerekun e dytë, Lakers bën një rikthim fantastik duke triumfuar në fund me tre pikë diferencë 108:111.

Pas një fillimi të tmerrshëm, Lakers bën një rikthim të mirë duke përmirësuar saktësinë e gjuajtjeve dhe epërsia erdhi në fillim të çerekut të katërt.

Anthony Davis ka qenë fantastik me 30 pikë, 15 kërcime e katër asistime.

View this post on Instagram

A post shared by NBA (@nba)

Me lojë fenomenale u dallua edhe LeBron James që shtoi 26 pikë e tetë kërcime, derisa Jarred Vanderbilt ishte i jashtëzakonshëm me 15 pikë, 17 kërcime e katër topa të vjedhur.

Te vendasit më efikasi ishte Luka Doncic me 26 pikë, derisa Kyrie Irving shtoi 21 të tjera, por që nuk mjaftuan për fitore.

Që nga ardhjet e reja në klub, Lakers kanë zhvilluar katër ndeshje ku kanë tre fitore dhe një disfatë.

Gjiganti amerikan tani kanë bilanc prej 29 fitoreve e 32 disfatave duke qëndruar në pozitën e 13-të, derisa Dallas janë në vendin e gjashtë me 32 fitore e 30 humbje.

Fitore ka shënuar edhe Portland Trail Blazers që ka mposhtur Houston Rockets me rezultat 131:114, ku Damien Lillard shënoi 71 pikë, më së shumti në karrierën e tij.

/Telegrafi/