Kush janë “gardianët” e Vulinit që mbrojtën muralin e Ratko Mlladiqit, dhe “trimat” që sulmuan aktivisten Aida Qoroviq?

Aktivistja për të Drejtat e Njeriut në Serbi, Aida Qoroviq, është arrestuar mbrëmë pasi që kishte hedhur vezë mbi muralin e kriminelit Ratko Mlladiq në sheshin e Beogradit.

Edhe pse burrat që e arrestuan janë pjesëtarë të MUP-it serb të veshur me rroba civile dhe nuk kanë dashur të tregojnë dokumentet zyrtare identifikuese para gazetarëve dhe qytetarëve, Nova.rs ka arritur të mësojë se për kënd bëhet fjalë, transmeton Telegrafi.

Gjatë aksionit pesë inspektorë të MUP-it njerëz të besueshëm të Aleksandar Vulinit iu vërsulën një gruaje, aktivistes Aida Qoroviq, e këtë operacion e ka udhëhequr Rade Bllagojeviq nga policia e Beogradit dhe “dora e tij e djathtë” Marko Xhorxheviq.

Bllagojeviq dhe Xhorxheviq janë të njohur si pjesëmarrës në shpartallimin e demonstratave, si dhe rrahjen e qytetarëve në protesta para Kuvendit të Serbisë në korrik të vitit të kaluar.

Gjatë protestave të atëhershme kishte ardhur deri te konfrontimi brutal i policisë me një numër të demonstruesve, duke përdorur dhunën që nuk ishte e lejuar me ligj dhe nuk ishte as edhe e arsyetuar.

Policia pati rrahur brutalisht qytetarët, duke përdorur gaz lotsjellës, shufra dhe kuajt për të shpërndarë turmën. Si pasojë e kësaj ishin lënduar dhjetëra qytetarëve, sikurse edhe disa gazetarë e fotoreporterë.

Bllagojeviq ishte mbrëmë në sheshin e Beogradit ku ishin mbledhur një numër i qytetarëve, në mesin e të cilëve ishte kreu i Lëvizjes së qytetarëve të lirë, Pavlle Grboviq.

Aktivistja për të Drejtat e Njeriut, Aida Qoroviq, u arrestua pasi hodhi disa vezë në muralin e Ratko Mlladiqit në sheshin e Beogradit.

Pas arrestimit të saj, persona që besohet të ishin policë me rroba civile, arrestuan aktivisten Jellena Jaqimoviq.

“Pasi që hodhën vezë mbi muralin e Ratko Mlladiqit, u janë afruar 10 persona me rroba civile që iu vërsulën atyre. Aidën e kanë tërhequr zvarrë e në këtë morën pjesë të paktën pesë prej këtyre personave. Një agresion të tillë nuk e kam parë në 15 vite sa merrem me gazetari”, tha për Nova.rs, gazetarja e Danasit dhe njëra prej dëshmitareve, Jelena Dikoviq.

Megjithatë, Aida Qoroviq u lirua rreth orës 19:00 e të njëjtën kohë për arrestimin e aktivistes është paralajmëruar një protestë. /Telegrafi/