Kurti në Forumin për gratë: Qytetarët tanë i besojnë grave, Vjosa Osmanin e kemi komandante supreme

Kryeministri i vendit, Albin Kurti sot në Forumin për Gratë, Paqen dhe Sigurinë theksoi se nuk ka pasur asnjë etapë ku gratë nuk janë përfshirë në thirrjet e përpjekjet për liri dhe paqe.

Ai tha para të pranishmëve se angazhimi i grave dhe vajzave të Kosovës nuk ka munguar as për shtetndërtim dhe nuk mungon në mbajtjen dhe funksionimin e shtetit tonë çdo ditë.

“Ato kanë mbajtur armë, bukë, laps, mikrofona dhe megafona në dorë me të vetmen kërkesë. Paqe, por paqe për të gjithë. Për veten dhe për fëmijët e tyre. Për kombin dhe për të ardhmen. Dhe historitë e ngjashme kanë plot shtete të përcaktuara drejt vlerave demokratike siç është edhe shteti ynë”, tha ai.

Ai tha se duke parë luftën në Ukrainë teksa po zhvillohet, kujtojmë prapa në kohë luftën tonë për liri – gra dhe burra, vajza dhe djem së bashku.

“Pjesëmarrja e grave dhe vajzave në forca të rendit dhe sigurisë e tejkalon vetveten. Është edhe trasim i rrugës për çdo vajzë që ndjekë këtë drejtim në jetë me guxim dhe vendosmëri.

Numri aktual i grave dhe vajzave në Forcës së Sigurisë së Kosovës dhe Policisë së Kosovës është domethënës, por patjetër duhet rritet edhe më tej. Nuk ka garanci tjetër për paqen dhe sigurinë pos që ajo të realizohet nga gratë dhe burrat bashkë. Por nuk ka as tjetër alternativë. Kjo është garancia më e drejta, më e sigurta dhe më e efektshmja e mundshme. Më shumë gra në forcat dhe organet e rendit do të thotë edhe promovim e realizim më i mirë i të drejtave të njeriut dhe të pakicave”, u shpreh kryeministri.

“Gratë jo veç i kanë ndihmuar politikat e sigurisë por edhe i kanë udhëhequr ato. Andaj edhe populli ynë u beson grave njëjtë sikur edhe burrave kur vjen fjala për çështje të sigurisë. Si qytetarë dhe si institucione jemi përcaktuar për Komandanten Supreme, për Presidenten e Republikës, znj. Vjosa Osmani Sadriu”, u shpreh kryeministri.

Ai më tej shtoi se pjesëmarrja e grave në vendimmarrje, institucione dhe forca të rendit e sigurisë, është domosdoshmëri.