Kurti: Dialogun e kemi kthyer nga takimet e fshehta për ndarjen e Kosovës, në proces transparent

Kryeministri Albin Kurti, ka thënë se Qeveria ka kthyer dialogun me Serbinë nga “takimet e fshehta për ndarjen e Kosovës”, në një proces transparent i cili njohjen reciproke e ka në qendër të saj.

Këtë deklaratë Kurti e ka dhënë në seancën e sotme të Kuvendit të Kosovës, ku po diskutohet për politikën e jashtme.

“E kthyem dialogun nga takimet e fshehta për ndarjen e Kosovës në një proces transparent që e ka njohjen reciproke në qendër të saj. Në këtë mënyrë Serbia është ç’armatosur në luftën e saj kundër Kosovës”, u shpreh shefi i ekzekutivit para deputetëve të martën.

Duke lavdëruar punën e qeverisë së tij, Kurti shtoi se kanë nënshkruar 85 marrëveshje ndërkombëtare dhe teknike si dhe kanë nisur vendosjen e marrëdhënieve diplomatike me shtete të reja.

Mes tjerash, Kurti bëri të ditur se ka nënshkruar një rregullore të re për Ministrinë e Punëve të Jashtme dhe Diasporës, “e cila do t’i përgjigjet nevojave të kohës”.

“Ky institucion ende rregullohet me ligjet të cilat janë miratuar në kohën kur është themeluar. Së shpejti MPJD do të funksionojë me ligje e rregullore që i përgjigjen nevojave të kohës”./Telegrafi/