Kufiri më i vogël kombëtar në botë është vetëm 85 metra i gjatë

Penon de Velez de la Gomera, një shkëmb i vogël në Afrikën veriore i pushtuar nga Spanja në vitin 1564, mban titullin për kufirin më të vogël kombëtar në botë, me gjatësi vetëm 85 metra.

Spanja ka pothuajse 2000 kilometra kufij tokësorë me Portugalinë dhe Francën, por gjithashtu ka kufij shumë më të vegjël me vende si Andorra, Mbretëria e Bashkuar (Gjibraltari) dhe Maroku, raporton odditycentral.

Pikërisht me këtë të fundit, kombin afrikan të Marokut, Spanja ndan kufirin më të vogël tokësor në botë, një shtrirje toke 85 metra e gjatë që lidh një shkëmb me madhësi rreth 19 mijë metra katrorë me bregdetin maroken, transmeton Telegrafi.

Penon de Velez de la Gomera ka qenë territor spanjoll që nga viti 1564 kur u pushtua nga admirali Pedro de Estopinan, dhe megjithëse Maroku ka pretenduar vazhdimisht për të, Spanja nuk ka pranuar kurrë të kthejë tokën dhe në fakt ka trupa të vendosura atje për të zbatuar sundimin spanjoll.

Penon de Velez de la Gomera është një nga të ashtuquajturat “vendet e sovranitetit” që Spanja ka në Afrikën e Veriut, së bashku me Ceuta, Melilla, Penon de Alhucemas, Ishujt Chafarinas dhe Isla de Perejil.

Lexo po ashtu Besojeni apo jo, kufiri mes Spanjës dhe Francës ndryshon çdo gjashtë muaj - mësoni arsyen interesante

Statusi i tij ligjor është ai i territoreve joautonome nën administrimin spanjoll. Është interesante se ky shkëmb djerrë ishte një ishull deri në vitin 1934 kur një tërmet krijoi një rrip të vogël toke dhe e ktheu ishullin në një gadishull. Ky kufi tokësor u njoh zyrtarisht si më i vogli në botë.

Penon de Velez de la Gomera aktualisht banohet vetëm nga trupat spanjolle të ngarkuara me mbikëqyrjen dhe mbrojtjen. Ushtarët ndërrohen çdo muaj dhe jetojnë në ambiente modeste, pa ujë të rrjedhshëm apo energji elektrike. Ata mbështeten vetëm në anijet e Marinës spanjolle që ofrojnë furnizime në baza të rregullta. /Telegrafi/