Kryetari i PLE denoncon rastin, vajza e komunitetit jo-shumicë largohet me forcë nga lokali në prani të ministrit Peci

Kryetari i Partisë Liberale Egjiptiane (PLE), njëherit ish-deputeti Veton Berisha ka publikuar një video ku tregon se si një vajzë e komunitetit jo-shumicë tërhiqet me forcë nga një lokal, dhe atë në prani të ministrit të Bujqësisë, Faton Peci.

Ish-deputeti Berisha thotë se si është e mundur të bëhet një veprim i tillë në prania të ministrit të Bujqësisë, e ky i fundit të mos reagojë.

“Si mundet të bëhet një gjest i tillë nga ana e kamarierit dhe ministri i qeverisë Kurti nuk e bën asnjë reagim dhe as që i bën përshtypje akti i shëmtuar!!!”, ka shkruar Berisha.

“Prej kujt pritet të kemi mbrojtje kur ndodhë kjo ngjarje para syve të atyre që kanë premtuar se komunitetet do të jetojnë dinjitetshëm!?”, ka shkruar tutje Berisha.

Për këtë video kishte reaguar edhe kryetari i AKR-së dhe deputeti opozitar Behgjet Pacolli.

“Bravo Ministër Peci… duhet pasur ndjenjat e MINISTRIT për të mos reaguar përballë një situate ku një vajza e vogël që kërkonte lemoshë u hodh me dhunë nga lokali. Mjerë na!”, ka shkruar Pacolli.