Krasniqi: Kosova s’mund të jetë vend me perspektivë, përderisa pushtetarët strehojnë protagonistë të aferave mafioze

Kryetari i Partisë Demokratike të Kosovës, Memli Krasniqi, ka kritikuar sërish qeverisjen e Albin Kurtit duke thënë se është e paaftë dhe nuk po i adreson aspak nevojat e qytetarëve.

Sipas tij, qytetarët dhe gjeneratat e reja, si ajo e periudhës së pavarësisë, nuk mund të shpresojnë në të ardhme më të mirë, përderisa një ambasador si Martin Berishaj, “merret në mbrojte nga pushteti”.

“Kosova, nuk mund të jetë vend me perspektivë, përderisa pushtetarët strehojnë protagonistë të aferave mafioze”, ka shkruar Krasniqi në Facebook.

Ai tutje ka përmendur inflacionin dhe krizën energjetike si probleme që sipas tij, Qeveria nuk po di t’i menaxhojë, ndërsa ka thënë se “kjo mungesë perspektive, si pasojë e një pushteti të paaftë, sot është duke e zbrazur Kosovën.

Kosova nuk mund të jetë vend me perspektivë, përderisa inflacioni ju bie si barrë e papërballueshme familjeve kosovare, ndërsa qeveria nuk ka ide se si ta zhbllokojë ekonominë. Nuk mund të ketë të ardhme të sigurt e të qëndrueshme për një vend si Kosova, që ka potencial për të eksportuar energji, e nga keqqeverisja përfundon në terr, ndërsa qytetarët paguajnë faturat më të shtrenjta në rajon. Nuk mund të ketë të ardhme të qëndrueshme e as demokratike, në një vend ku pushteti paragjykon drejtësinë dhe sulmon mediat e lira”, ka shkruar tutje Krasniqi.

Në fund, kreu i PDK-së ka thënë se kjo nuk është e ardhmja që qytetarët e duan për atdheun e tyre e as e ardhmja për të cilën ata kanë sakrifikuar.

“E ardhmja e Kosovës duhet të jetë një tregim krejtësisht ndryshe. Jetësimin e asaj të ardhmeje duhet ta nisim tani dhe pa vonesë, së bashku, me dashuri e përkushtim për Kosovën e fëmijëve tanë”, ka përfunduar ai. /Telegrafi/