Korrigjimi estetik i hundës në shekullin e XIX-të: Libri i rrallë tregon arritjet e para në kirurgjinë plastike, të realizuara para 185 vitesh (Foto)

Është prezantuar para publikut libri ekstrem i rrallë, që tregon për intervenimet estetike në hundë të realizuara para 185 vitesh.

Profesori gjerman Johann Friedrich Dieffenbach, ka vënë themelet e këtyre intervenimeve, që u bënë bazë e teknikave moderne, të cilat i dokumentoi në një libër të publikuar më 1833, transmeton Telegrafi.

Ky libër, tregon se intervenimet kirurgjike në hundë nuk janë vetëm obsesion i shekullit të XXI-të, megjithëse teknikat e Dieffenbach mund të hyjnë në punë edhe sot e kësaj dite. Pjesa tjetër e kapitujve, nuk është për ata që kanë gjendje të dobët shëndetësore.

Në një prej skicave, tregohet se si largohet tumori prej hunde, kurse një tjetër detajon formën se si rregullohet hunda e ‘gjymtuar prej sëmundjes’.

Përmes një kapitulli të veçantë, tregohet në detaje se si formësohet një hundë e re, me anë të lëkurës së marrë prej krahut.

Aty saktësohet se si hiqet kërci, që t’i ndryshohet forma hundës – shembull ky që tregon se kjo ishte vetëm për çështje kozmetike, se sa për nevoja shëndetësore.

Libri me 159 faqe, që ka 26 diagrame të detajuara, është shitur në ankand për tetëmijë euro, te një koleksionues privat.

“Dieffenbach ishte pionier i rinoplastikës dhe intervenimeve kirurgjike. Ai ishte në mesin e të parëve mjekë, që i mpinte pacientët para intervenimit”, ka thënë Sharon Gee, studiues i mjekësisë.

Pos këtyre shkrimeve, pritet që së shpejti të publikohet edhe një libër tjetër nga i njëjti autor, që tregon për rikonstruktimin e një hunde të shkëputur. /Telegrafi/