Koha kur shkoni për të fjetur mund ta parashikojë rrezikun e diabetit

Studiuesit amerikanë zbuluan se njerëzit që rrinë zgjuar vonë dhe zgjohen vonë, kanë një rrezik 19 për qind më të lartë për të zhvilluar diabet të tipit 2.

Autori i studimit, dr. Tianyi Huang nga Brigham and Women’s Hospital, ka thënë se modelet e gjumit janë “pjesërisht të përcaktuara gjenetikisht, kështu që ato mund të jenë të vështira për t’u ndryshuar”.

“Njerëzit që mendojnë se janë ‘bufat e natës’ mund të kenë nevojë t’i kushtojnë më shumë vëmendje stilit të tyre të jetesës, sepse kronotipi i tyre i mbrëmjes mund ta rritë rrezikun për diabetin e tipit 2”, ka shtuar ai.

Lexo po ashtu Çfarë të hani kur trupi juaj dëshiron sheqer dhe ëmbëlsira

Me kronotip, shkencëtarët nënkuptojnë tendencën natyrore të një individi për të kërkuar aktivitet dhe për të fjetur në periudha të ndryshme.

Ekipi hulumtues zbuloi më parë se njerëzit me modele më të parregullta të gjumit janë në rrezik më të lartë të zhvillimit të diabetit dhe sëmundjeve të zemrës. Ata zbuluan gjithashtu se njerëzit me kronotipe të mbrëmjes kishin më shumë gjasa të kishin modele të parregullta gjumi.

Për studimin e ri, ata donin të kuptonin lidhjen midis kronotipit dhe rrezikut të diabetit, ndaj morën parasysh edhe rolin e faktorëve të stilit të jetesës.

Ekipi analizoi të dhënat nga më shumë se 63.000 infermierë dhe përfshiu kronotipin e vetraportuar – shkallën në të cilën pjesëmarrësit e perceptonin veten si njerëz të mbrëmjes ose të mëngjesit, si dhe cilësinë e dietës, peshën dhe indeksin e masës trupore (BMI), kohën e gjumit plus zakonet e pijes dhe të duhanit.

Lexo po ashtu Gjendjet shëndetësore që mund të çojnë në cilësi të dobët të gjumit

Kronotipi i mbrëmjes u shoqërua me një rritje prej 72 për qind të rrezikut të diabetit përpara se të merreshin parasysh faktorët e stilit të jetesës. Pas llogaritjes së këtyre gjërave, kronotipi i mbrëmjes u shoqërua me një rritje prej 19 për qind të rrezikut të diabetit.

Në mesin e atyre në studim që konsiderohen të kenë stilet më të shëndetshme të jetesës, vetëm gjashtë për qind kishin kronotipe të mbrëmjes. /Telegrafi/