Kissinger për festimet e sulmit të Hamasit në Berlin: Gjermania la shumë të huaj, kjo është gabim

Ish-Sekretari amerikan i Shtetit, Henry Kissinger, beson se festimi në rrugët e Berlinit pas sulmit të javës së kaluar nga grupi militant palestinez Hamas ndaj Izraelit është një tregues se shumë të huaj janë lejuar në Gjermani.

Ai shpjegoi pse mendonte se ishte gabim të lejohej një numër i madh i të huajve të vendoseshin në Gjermani.

“Ishte një gabim i madh të lirosh kaq shumë njerëz të një kulture, feje dhe koncepti krejtësisht të ndryshëm, sepse krijon presion grupor në vend që e lejoi atë”, tha diplomati njëqindvjeçar në një intervistë për stacionin televiziv gjerman Welt TV.

Kissinger ka lindur në Gjermani dhe emigroi prej saj në vitin 1938, gjatë sundimit nazist në këtë vend. Ai është arkitekti i politikës së jashtme të Shteteve të Bashkuara të Amerikës gjatë Luftës së Vietnamit.

I pyetur se si e sheh festën e arabëve në Berlin pas sulmit të lartpërmendur, ai u përgjigj se ishte e dhimbshme për të. Ai e quajti sulmin e Hamasit “një akt të hapur agresioni” që “duhet të përballet me njëfarë dënimi”. Ai vuri në dukje rrezikun e përshkallëzimit në këtë pjesë të botës.

“Konflikti i Lindjes së Mesme është në rrezik të përshkallëzimit dhe përfshirjes së shteteve të tjera për shkak të presionit të opinionit të tyre publik”, tha Kissinger, duke iu referuar përvojës së Luftës së Yom Kipur gjatë tetorit të vitit 1973, kur një koalicion arab i udhëhequr nga Egjipti dhe Siria sulmoi Izraelin.

Ai beson se qëllimi i vërtetë i Hamasit dhe mbështetësve të tij mund të jetë vetëm mobilizimi i botës arabe kundër Izraelit dhe devijimi nga rruga e negociatave të paqes. Për të, nuk përjashtohet që Izraeli të veprojë kundër Iranit nëse konsideron se ky vend është i përfshirë në sulmin e fundit të Hamasit.

Ish-zyrtari amerikan deklaroi se sulmi i Hamasit ndaj Izraelit dhe agresioni rus ndaj Ukrainës përfaqësojnë një “sulm themelor ndaj sistemit ndërkombëtar”. /Telegrafi/