Kisha 400-vjeçare në Kolonjë, buzë shkatërrimit

Kisha e Barmashit në rrethin e Kolonjës e ndërtuar në vitin 1610 me një stil të veçantë arkitekturor, sot ka një pamje tërësisht të degraduar. Edhe pse prej vitit 2015 kjo pasuri kulturore është cilësuar në gjendjen “SOS”, sërish kjo nuk iu ka mjaftuar instancave përkatëse për të shpëtuar vlerat e mbetura në objektin 400-vjeçar i cili po shkon drejt zhdukjes së plotë të tij.

Gjergji Koki, drejtor i drejtorisë rajonale të trashëgimisë kulturore tregon se në vitin 2015 është raportuar situata e kësaj kishe pas survejimit të detajuar, dhe me pas është realizuar një projekt vlera e te cilit nuk ishte e përballueshme nga buxheti vjetor i shtetit. Koki hedh poshtë aludimet se për këtë kisha ka pasur çelje fondesh .

E shpallur si monument kulture i kategorisë së parë, por mesa duket vetëm emri i ka mbetur i tille në një tabelë të vjetërsuar nga pluhuri i harresës. Midis gërmadhash, shkurresh e mbeturinash, me një çati të shkatërruar , mure të rrënuara, në këtë monument po zhduken afresket murale katër shekullore. Edhe pse janë duke kërkuar donatorë për shpëtimin e 35 për qind të kishës, drita jeshile të paktën për këtë vit duket se nuk është ndezur. /Shqiptarja/