Policia e Gjakovës me plan operativ për sezonin dimëror, kapiteni Sahatqija shpalos detaje

Duke filluar nga nesër (15 nëntor 2024), e duke vazhduar deri më datë 15 mars 2025, të gjithë shoferët që qarkullojnë nëpër rrugët e Republikës së Kosovës, duhet të bëjnë ndërrimin e gomave të veturave të tyre, duke kaluar nga gomat e verës në goma të dimrit.

Në një intervistë dhënë Telegrafit, Kapiten Albin Sahatqija, Komandant i Njësisë së Trafikut Rajonal të Policisë në Gjakovë, tregoi specifikisht se me çfarë goma duhet të pajisen shoferët gjatë sezonit të dimrit.

“Prej datës 15.11.2024 deri me datën 15.03.2025 duhet të bëhet ndërrimi i gomave të dimrit. Gomat e dimrit duhet të jenë M+S dhe thellësia e larvae të pneumatikëve nuk guxon të jetë më e vogël se 4 mm”, potencoi ai.

Kapiten Sahatqija po ashtu potencoi, që policia duke u bazuar në nenin 248 të rregullave të trafikut rrugor, do të shpërndajë gjoba për të gjithë ata shoferë që nuk pajisen me goma dimërore në periudhën e paraparë kohore.

“Sipas nenit 248 të rregullave të trafikut rrugor, në qoftë se polici has mjetin në rrugë në të cilën lëvizja e atij lloji mjeti është e ndaluar, ose lëviz pa pajisje dimërore në pjesën e rrugës dhe në kohën kur pajisja dimërore është e detyrueshme, do ta urdhërojë shoferin që menjëherë të ndërpresë lëvizjen e mjetit ose të vazhdojë lëvizjen e mjetit në rrugë në të cilën lëvizja e atij lloji mjeti lejohet, përkatësisht ta përdorë pajisjen dimërore.

Polici ka të drejtë të përdorë pajisje speciale për ndalim të mjetit rrugor.

Dënohet për kundërvajtje, me gjobë prej njëqindepesëdhjetë (150) euro, shoferi i cili vepron në kundërshtim me dispozitat e paragrafit 1. të këtij neni.

Dënohet për kundërvajtje, me gjobë prej treqind (300) euro, edhe personi juridik ose institucioni në emër të të cilit dhe brenda autorizimeve të të cilit ka vepruar personi i përcaktuar në paragrafin 5. të këtij neni”, shtoi tutje ai.

Sahatqija për Telegrafin tha që njësia Rajonale e Trafikut rrugor në DRP-Gjakovë ka përgatitur planin operativ të sezonës dimërore dhe plani veçse ka filluar të implementohet.

“Njësia Rajonale e Trafikut rrugor në DRP-Gjakovë ka përgatitur planin operativ të sezonës dimërore dhe plani veçse ka filluar të implementohet. Objektivat e implementimit të ketij plani janë që t’i vetëdisojmë shoferët e mjeteve motorike se si duhet të sillen në trafikun rrugor gjatë sezonës dimërore dhe të kujdesen për sigurinë e tyre dhe të tjerëve në rrugë, mbulimin e pikave të zeza dhe masa tjera preventive.

Poashtu gjatë planit është paraparë edhe plani veprimi shtesë operativ- “Kontrollimi i jashtëzakonshem teknik i mjeteve motorike”.

Përveç saj janë mbajtur dhe përsëri planifikohen të mbahen takime me zyrtarë/inxhinierë të Ministrisë së Infrastrukturës dhe Kompanitë për pastrimin e rrugëve.”.

Duke marrë parasysh vështirësitë që mund të paraqiten gjatë qarkullimit rrugor gjatë sezonit dimëror, kapiten Sahatqija apeloi që gjatë kësaj periudhe shoferët të tregohen sa më të kujdesshëm.

“Njësija Rajonale e Trafikut rrugor në DRP-Gjakovë ju bënë apel gjithë shoferëve që gjatë qarkullimit rrugor të jenë të vëmendshëm, të kujdesen per veten dhe të tjeret, duke marrë parasysh kushtet atmosferike (shiu/bora) dhe kushteve të rrugës, ku për shkak të temperaturave të ulta krijohet akulli i zi në rrugë, atëherë duhet t’i përshtaten kushteve të rrugës dhe atmosferike.

Poashtu këshillohen gjithë shoferët që t’i shmangen vozitjes me automjete në relacione të shkurta.

Respektimi i rregullave dhe dispozitave ligjore do të ndikojë dukshëm në parandalimin e aksidenteve dhe viktimave në rrugë”, përfundoi ai.

Theksojmë që të gjithë shoferët pa marrë parasysh kushtet atmosferike, duhet t’i zëvendësojnë gomat e verës me ato të dimrit, si dhe të pajisen me pajisje të tjera dimërore. /Telegrafi/