Javën e ardhshme ekspertët diskutojnë për demarkacionin

Një seminar me temën “Kufijtë në të Drejtën Ndërkombëtare – Kontestimi dhe Njohja” do të organizohet të hënën nga Fakulteti Juridik i Universitetit të Prishtinës, në koordinim me Katedrën e së Drejtës Ndërkombëtare. Në këtë seminar është paraparë të zhvillohet diskutimi i teorive të cilat sfidojnë çështjen e kufijve.

“Tema e seminarit është çështje shumë aktuale dhe e debatueshme në ditët e sotme në Kosovë, prandaj në këtë diskutim do të potencohet perspektiva e kufijve në të drejtën ndërkombëtarë”, thuhet në njoftimin që u është përcjellë profesorëve të juridikut, e një kopje të të cilit e ka siguruar Koha.Net.

Përpos pjesëmarrjes së rektorit të UP-së, Marjan Dema, e dekanit të Juridikut, Haxhi Gashi, në këtë seminar do t’i prezantojnë pikëpamjet e tyre disa nga njohësit më të mirë kosovarë të së drejtës ndërkombëtare.

Në krye të listës janë Zejnullah Gruda e Enver Hasani. I pari është profesor në pension dhe për një kohë të gjatë ka shërbyer në misione diplomatike, ndërsa i dyti ka qenë rektor i UP-së dhe kryetar i Gjykatës Kushtetuese.

Gruda do të flasë në temën “Deliminimi i territorit sipas te Drejtës Ndërkombëtare”, e Hasani në temën “Përcaktimi i kufijve i determinuar sipas të Drejtës Ndërkombëtare”.

Në anën tjetër, Hajredin Kuçi, profesor i të Drejtës së Unionit Evropian dhe të Drejtës Ndërkombëtare Private, do të flasë në temën mbi “Mendimet e Komisionit të Badinterit dhe koherenca e tyre sot”. Kuçi është aktualisht ministër i Drejtësisë.

Iliriana Islami, profesoreshë e të Drejtës Ndërkombëtare, do të flasë për “Kontestet territoriale sipas Gjykatës Ndërkombëtare të Drejtësisë”. Islami ka qenë gjyqtare e Gjykatës Kushtetuese.

Në këtë seminar do të kontribuojnë edhe Remzije Istrefi, profesoreshë e të Drejtës Ndërkombëtare, me prezantimin për “Të drejtat e Njeriut dhe shteti Sovran – Nevojat humanitare të një bote globale”, si dhe Vigan Qorrolli, Asistent në grup lëndësh të së Drejtës ndërkombëtare, i cili do të flasë në temën “Roli i Parimit ‘UTTI Possidettis’ në pavarësimin e Kosovës”.