Jan Petersen: Jemi të gatshëm për gjëra të paparashikuara (Video)

Me 12 ekspertë, 24 mbikëqyrës afatgjatë të cilët do të arrijnë gjatë javës së ardhshme dhe me së paku edhe 300 mbikëqyrës që do të arrijnë disa ditë para zgjedhjeve, misioni mbikëqyrës i OSBE/ODIHR, e filloi misionin e vetë në Maqedoni, njofton Telegrafi Maqedoni.

Shefi i misionit mbikëqyrës, ambasadori norvegjez Jan Petersen në emisionin „10 minuta“ në Tv 21 deklaroi që të gjithë duhet të kuptojnë se roli i misionit është që ta mbikëqyr procesin zgjedhor dhe të raportojë, dhe jo të përzihet në punën e institucioneve kompetente për organizimin e zgjedhjeve.

„Ne nuk do ti komentojmë zgjedhjet, do të lëmë që faktet të flasin për vete. Pastaj u mbetet institucioneve dhe partive se si do ti shfrytëzojnë këto të dhëna. Zgjedhjet janë shpallur për 5 qershor, nuk hyjmë më tej dhe veprojmë në bazë të datës së caktuar paraprakisht, por nëse ndodh diçka e paparashikuar, edhe atë do ta kemi parasysh. Por, atë që e kemi si informatë nga partitë, data është 5 qershori“, tha Petersen.

Petersen thotë që misioni mbikëqyrës nuk interesohet për rezultatin e zgjedhjeve, por për atë nëse procesi është transparent dhe i zbatuar sipas standardeve të OSBE.

Vlerësimin e parë të zgjedhjeve ODIHR do ta publikojë një ditë pas zgjedhjeve, e deri atëherë dy herë do të vlerësohet fushata zgjedhore.