Ish-drejtori i Urbanizmit në Prishtinë: Komunat nuk guxojnë të ndërhyjnë në vlerësimin e pronave, por mund ta zbusin normën tatimore

Ish-drejtori i Urbanizmit në Komunën e Prishtinës, Ardian Olluri është përfshirë në debatin për rritjen e tatimeve për objektet e banimit në Prishtinë. Ai ka propozuar që komunat të bëjnë ndërhyrje në normën tatimore, në mënyrë që të u lehtësohet barra qytetarëve.

Olluri përmes një shënimi në Facebook ka thënë se në dy vitet e fundit vlera e patundshmërive në treg ka shënuar rritje në vazhdimësi, andaj sipas tij është normale që kjo duhet të reflektohet në çfarëdo procesi të vlerësimit të pronave.

“Vlerësimi i pronave për qëllim të caktimit të vlerës së tatimit është obligim ligjor. Dhe jo vetëm aq por ky vlerësim duhet të bëhet në pajtim me rregullat dhe metodologjinë e përcaktuar me ligj dhe akt nënligjor”, ka shkruar Olluri.

Mirëpo, sipas tij vlera e tatimit në pronë nuk ndikohet vetëm nga vlera e pronës por edhe nga norma tatimore.

“Përderisa, në njërën anë vlera e pronës caktohet në kuadër të një procesi objektiv të vlerësimit i cili nuk varet nga vullneti i subjekteve por nga zhvillimet në tregun e patundshmërive. Në anën tjetër norma tatimore është vendim politik i Kuvendit të Komunës i cili varet nga vullneti politik i akterëve politik”.

Lexo po ashtu Rama e bën përgjegjëse MF-në: Prishtina ka caktuar përqindjen më të ulët të mundshme të tatimit në pronë

“Andaj, pasi gjendja ekonomike e qytetarëve nuk ka lëvizur në përpjesëtim të drejtë me vlerën e patundshmërive në treg, vlera e tatueshme e këtyre patundshmërive është bërë e papërballueshme”.

Ai thotë se komunat duhet të zbusin normat tatimore pasi ndërhyrja në procesin e vlerësimit të pronave është veprim i paligjshëm.

“Në këtë situatë Komunat duhet të ndërhyjnë në normën tatimore, në mënyrë që të u lehtësohet barra qytetarëve. Por asesi, as nuk duhet të kërkohet e as nuk guxon të ndërhyhet në procesin e vlerësimit, çfarëdo ndërhyrje në këtë proces do të ishte e paligjshme”, ka shkruar tutje Olluri.

Ndryshe, vendimi për ngritjen e çmimit të tatimit në pronë, ka sjell përplasje dhe paqartësi ndërmjet Ministrisë së Financave (MF), Asociacionit të Komunave të Kosovë (AKK) dhe opozitës.

Lexo po ashtu Ministria e Financave del me njoftim: Shkallën e tatimit në pronë e përcaktojnë vetë komunat

Dhjetëra qytetarë nga gjithë vendi kanë reaguar, duke mos u pajtuar me këtë vendim.

Ministria e Financave me anë të një reagimi publik, është shprehur se shkallën e tatimit e përcaktojnë vetë komunat.

“Bazuar në Ligjin për Tatim në Pronë, obligohet që në baza të rregullta të bëjë vlerësimin e pronave të paluajtshme, ndërsa shkallën e tatimit e përcaktojnë vetë komunat”, thuhet në arsyetimin e MF-së. /Telegrafi/