Instagram Reels zbulon veçori të reja pas ndalimit të TikTok

Instagram njoftoi një përditësim të veçorisë së tij të videove Reels këtë mëngjes, së bashku me lajmin se Gjykata Supreme la në fuqi ligjin që do të ndalojë TikTok në SHBA nga 19 janari.

Përditësimi, njoftoi Meta, do ta bëjë më të lehtë për përdoruesit të zbulojnë përmbajtjen që miqtë dhe ndjekësit po pëlqejnë në platformë dhe do të inkurajojnë përdoruesit të fillojnë biseda rreth përmbajtjes së Reels.

Bëhet e ditur se veçoria po fillon të zbatohet në SHBA.

Kompania është e gatshme të kapë një numër përdoruesish të TikTok pas ndalimit të SHBA-së, veçanërisht krijuesit që mbështeten në rrjete sociale për të ardhura, shkruajnë mediat e huaja, përcjell Telegrafi.

Ndonëse një grup i konsiderueshëm i përdoruesve të TikTok kanë “migruar” tashmë në aplikacionin kinez RedNote në shenjë proteste ndaj ndalimit, do të jetë më e vështirë për krijuesit që të fitojnë para nga ndjekësit e tyre në një aplikacion që përdoret kryesisht nga përdoruesit e rrjetit kinez, por jo nga bizneset dhe markat amerikane.

Meta, duke u përpjekur të tërheq vëmendjen e përdoruesve të TikTok të premten, njoftoi se po shton një veçori që shfaqet në këndin e sipërm djathtas të Reels, duke e bërë më të lehtë shikimin e përmbajtjes që miqtë dhe ndjekësit kanë pëlqyer ose komentuar.

Kjo shfaqet si një buton i vogël me fotografitë e profilit të atyre që janë angazhuar me përmbajtjen dhe një ikonë të vogël për të treguar se çfarë lloj ndërveprimi kishin.

Përveç kësaj, kompania tha se do të prezantojë një “shirit të ri përgjigjeje” që do t’i lejojë përdoruesit t’i përgjigjen lehtësisht përmbajtjes që pëlqejnë miqtë e tyre. /Telegrafi/