Dy hapësira në shtëpi njihen zakonisht si baza për shumimin e baktereve - kuzhina dhe banja. Jo, nuk është sfungjeri!
Një studim i publikuar në "Journal of Food Protection" nga Agjencia Amerikane e Ushqimit dhe Barnave ekzaminoi rreziqet më të mëdha të kontaminimit të kryqëzuar në kuzhinë gjatë përgatitjes së vaktit.
Para kësaj, besohej se sfungjeri për larjen e enëve, aparati i kafesë, dërrasa e prerjes, si dhe lavamani ishin burimet më të mëdha të infeksionit.
Por rezultatet treguan një situatë paksa të ndryshme, transmeton Telegrafi.
Në studim, morën pjesë 371 persona detyra e të cilëve ishte të përgatisnin një hamburger me mish gjeldeti duke përdorur erëza, qoftere dhe pak sallatë të gjelbër të parapaketuar.
Në fund, ndërsa shumica e sipërfaqeve ishin pozitive për bakteret në 10 deri në 20 për qind të rasteve, 48 për qind e erëzave në kavanoza, të përdorura gjatë përgatitjes së hamburgerëve, ishin pozitive për norovirus (virusi që shkakton të ashtuquajturin grip të stomakut është shumë ngjitës dhe lehtësisht i transmetueshëm).
Gjithashtu, hulumtimi tregoi se dërrasat e prerjes erdhën në vendin e dytë si sipërfaqet më të ndotura, ndërsa kapakët e koshit u renditën në vendin e tretë.
“Hulumtimi ynë tregon se çdo enë me erëza që prekni gjatë përgatitjes së mishit të papërpunuar mund të kontaminohet”, tha udhëheqësi i studimit, Donald Schaffner, duke shtuar se larja e duarve është thelbësore pas trajtimit të mishit të papërpunuar, shpendëve dhe vezëve. Gjithashtu, të gjitha sipërfaqet që kanë qenë në kontakt me mishin duhet të dezinfektohen.
Administrata e Ushqimit dhe Barnave rekomandon një strategji me katër hapa të trajtimit të ushqimit:
▪ pastroni duart dhe sipërfaqet
▪ veçoni ushqimin e papërpunuar nga ushqimi tjetër
▪ gatuani në temperaturën e duhur
▪ vendoseni në frigorifer brenda dy orëve nga zierja
/Telegrafi/
