Hoti: Qeveria po shpenzon paranë publike pa asnjë kriter ligjor

Qeveria ka ngecur në reforma ekonomike dhe po bënë shpenzimin e parasë publike pa përfillur asnjë kriter ligjor.

Kështu ka thënë shefi i Grupit Parlamentar të Lidhjes Demokratike të Kosovës, Avdullah Hoti gjatë një takimi me shefen e Misionit të Fondit Monetar Ndërkombëtar për Kosovën, Stephanie Eble.

Hoti dhe Eble kanë biseduar për stabilitetin fiskal të vendit dhe për buxhetin për vitin 2019.

“Gjatë takimit, Hoti informoi përfaqësuesit e Misionit të Fondit Monetar Ndërkombëtar për zhvillimet ekonomike dhe politike në vend. Po ashtu, temë bisede ishte edhe stabiliteti fiskal i vendit si dhe Buxheti për vitin 2019. Me këtë rast, Hoti ngriti shqetësimet e tij dhe të Lidhjes Demokratike të Kosovës lidhur me shpenzimet e parasë publike nga ana e Qeverisë pa përfillur asnjë kriter ligjor, si dhe për stagnimin e reformave ekonomike dhe të skemave sociale. Hoti gjithashtu siguroi Eble se si Grup Parlamentar do të kujdesen për stabilitetin financiar të Kosovës”, thuhet në njoftimin e LDK-së, përcjell Telegrafi.

Eble ka vlerësuar lartë për përmirësimin e kushteve ekonomike në vend.

“Shefja e Misionit për Kosovë, Stephanie Eble e vlerësoi lart përkushtimin e Hoti së bashku me anëtaret e tjerë të Grupit Parlamentar të LDK- së për punën në përmirësimin e kushteve ekonomike ne vend si dhe për politika konstruktive karshi partnerëve ndërkombëtarë posaçërisht karshi Fondit Monetar Ndërkombëtar”, përfundon njoftimi. /Telegrafi/