Haradinaj: Nuk guxojmë të bëjmë eksperimente, i kam kërkuar liderëve para dy vitesh që të merren vesh me Washingtonin

Kryetari i Aleancës për Ardhmërinë e Kosovës (AAK), njëherësh deputet i Kuvendit të Kosovës, Ramush Haradinaj ka drejtuar akuza ndaj kryeministrit të vendit, Albin Kurti për situatën e krijuar në vend.

Haradinaj në një konferencë për media tha se sulmi që ka ndodhur të dielën në veri është i sponsorizuar nga Serbia.

Ai tutje shtoi se Serbisë dhe Rusisë i intereson jostabiliteti për ta mbajtur Kosovën larg integrimeve e institucioneve euroatlantike.

“Të dielën ka ndodh një sulm terrorist në Kosovë, është i sponsorizuar nga Serbia por është mposhtur nga Kosova me sukses, pra ata janë mposhtur me turp. Por, pse ka ndodhur ky sulm dhe kujt i intereson dhe çka janë efektet? Besoj se Serbisë dhe Rusisë i intereson jostabiliteti dhe me e mbajt Kosovën larg integrimeve e institucione euroatlantike”, tha kreu i AAK-së.

Haradinja para mediave tha se Kosova nuk guxon të bëj eksperimente por duhet patjetër të bisedoj vetëm me aleatin e Kosovës, Shtetet e Bashkuara të Amerikës.

“Mashtrimi nuk kalon. Para 2 vjetësh i kam kërkuar Kurtit, Osmanit dhe Konjufcës, shkoni në Washington merruni vesh, arrini marrëveshjen dhe të zbatohet. Nuk guxojmë me bo eksperimente tjera në dëm tonin pos me u marr vesh me Amerikën”, tha ai.

Tutje Haradinaj foli edhe për vazhdimin e dialogut Kosovë-Serbi për të cilën tha se “nuk është në interes tonin vazhdimi dhe me mbet kështu të destabilizum”. /Telegrafi/