Grapeland afër inkuadrimit në Superligë, rahovecianët synojnë të krijojnë stabilitet në elite

Pas përfundimit të garave të rregullta në kuadër të Ligës së Parë të basketbollit të Kosovës, fazë të cilën nga 14 ndeshje të zhvilluara KB “Grapeland” e mbylli me 13 fitore e një humbje, tashmë ka filluar edhe faza e play-off, ku ekipi nga Rahoveci, është shumë afër inkuadrimit në Superligën e basketbollit të Kosovës.

Në një intervistë dhënë Telegrafit, Indrit Krasniqi, kryetar i klubit të basketbollit “Grapeland”, tha që për të arritur deri tek ky sukses, klubi ka punuar vazhdimisht.

“Që nga fillimi i themelimit të klubit kemi punuar vazhdimisht dhe intensivisht, dhe ka pasur njerëz që kanë dalë ndoshta edhe nga tetë orë për me punu për këtë klub, dhe mendoj se nuk është rastësi pse është gjithë ky sukses, sepse është punuar për këtë ditë.”, tha fillimisht Krasniqi.

Duke e marrë parasysh dallimin në kualitet dhe intensitet në mes të Ligës së Parë të Basketbollit dhe Superligës, Krasniqi potencoi që nëse inkuadrohen në Superligë, KB “Grapeland” e ka një plan afatgjatë.

“Nëse veç inkuadrohemi në Superligë, po mendoj që do ta bëjmë një punë të mirë, sepse e kemi një plan një plan afatgjatë, të cilin do ta zbatojmë, dhe po mendojmë që ky plan do të ketë sukses në të ardhmen, plan i cili do të na ndihmojë që ne ta krijojmë njëfarë stabiliteti në Superligë.” , shtoi tutje Krasniqi.

Invervistën e plotë të zhvilluar me Indrit Krasniqin, kryetar i klubit të basketbollit “Grapeland” e gjeni të bashkangjitur më poshtë. /Telegrafi/