Gra, kushtojini vëmendje: Ky model i zakonshëm i flokëve mund të shkaktojë rënie

Disa modele flokësh që duken elegante në pamje të parë, mund të jenë të dëmshme për shëndetin e flokëve

Mjekët paralajmërojnë se stilimi i gabuar i përditshëm mund të shkaktojë rënie të përhershme të flokëve, një gjendje e njohur si alopeci tërheqëse.

Sipas ekspertit të kujdesit për lëkurën dhe flokët, Dr. Suhail Alam, modelet që tërheqin fort flokët si bishtkali të shtrënguar pas, janë veçanërisht problematike.

“Këto stile shkaktojnë stres të vazhdueshëm mbi folikulat e flokëve, duke rezultuar në rënie progresive të tyre,” tha ai.

Një studim i botuar në Journal of the American Academy of Dermatology zbuloi se deri në një në tre gra që mbajnë rregullisht stile të tilla, përjetojnë njëfarë niveli të humbjes së flokëve, transmeton Telegrafi.

Gabimet e përditshme që dëmtojnë flokët

Përveç stilimit të fortë, Dr. Alam paralajmëron edhe për disa zakone të tjera të përditshme që mund të jenë të dëmshme:

Flokë të lagur gjatë gjumit

“Nuk duhet të flini me flokë të lagur. Ato janë më të brishta kur janë të njomë dhe fërkimi me jastëkun shkakton këputje dhe ngatërresa,” thotë ai. Flokët duhet të thahen natyrshëm ose me tharëse para gjumit.

Jastëkët prej pambuku

Pambuku mund të përkeqësojë gjendjen e flokëve dhe të lëkurës. Eksperti rekomandon përdorimin e mbulesave prej mëndafshi apo satenit, të cilat zvogëlojnë fërkimin dhe ndihmojnë në ruajtjen e strukturës së flokëve.

Larja e tepërt

Larja e flokëve me shampo më shumë se dy ose tri herë në javë, ose pastrimi i fytyrës më shpesh se dy herë në ditë, mund të dëmtojë barrierën natyrale mbrojtëse të lëkurës.

Dushi me ujë të nxehtë

Uji shumë i nxehtë mund të shkaktojë tharje dhe ndjeshmëri të lëkurës. Prandaj, rekomandohet përdorimi i ujit të vakët dhe kufizimi i dushit në më pak se 10 minuta, për të ruajtur hidratimin natyror të trupit.

Kujdesi i përditshëm i duhur dhe modelet më të buta të flokëve mund të ndihmojnë jo vetëm në parandalimin e rënies, por edhe në përmirësimin e shëndetit të përgjithshëm të flokëve dhe lëkurës. /Telegrafi/